جنوبی فلپائن کے باشندوں نے فلسطینیوں کے ساتھ اظہار یکجہتی کے لیے ریلی نکالی اور اسرائیلی مصنوعات کا بائیکاٹ کرنے کا عہد کیا۔

عرب میڈیا کے مطابق جنوبی فلپائن کے باشندوں نے فلسطینیوں کے ساتھ اظہار یکجہتی کے لیے ریلی نکالی اور اسرائیل اور غزہ پر جنگ کی حمایت کرنے والے ممالک کی مصنوعات کا بائیکاٹ کرنے کا عہد کیا۔

اس ریلی میں مسلم منڈاناؤ کے بنگسامورو خود مختار علاقے کے کئی مقامات کا احاطہ کیا گیا جو کیتھولک اکثریتی فلپائن کا علاقہ ہے جہاں ملک کے 70 لاکھ مسلمانوں کی اکثریت رہتی ہے۔

اس ریلی کا اہتمام سیاسی، سول سوسائٹی اور نجی شعبے کی تنظیموں کے اتحاد بنگسامورو ایکشن اگینسی نے کیا تھا۔

اس ریلی کا آغاز مگوئنداناؤ ڈیل نورٹے صوبے کے کوتاباتو شہر سے ایک قافلے کے ساتھ ہوا، جو چھ قصبوں کو عبور کرتے ہوئے ہمسایہ ماگوئنداناؤ ڈیل سور کے شریف اگواک میں اختتام پذیر ہوئی۔

بی اے اے آئی کے کمیونیکیشن آفیسر عبدالباسط بینیٹو نے میڈیا کو بتایا کہ شریف اگواک کے مقام پر ایک اندازے کے مطابق 10 ہزار افراد صوبائی جمنازیم میں جمع ہوئے، جبکہ ہزاروں افراد جمنازیم کے باہر بھی موجود تھے۔

بنگسامورو کے باشندے فلسطین میں پائے جانے والے مصائب کو بیان کر سکتے ہیں کیونکہ یہ خطہ 2014 ء تک چار دہائیوں سے زائد عرصے تک جاری رہنے والے مسلح تنازعے کا مرکز تھا۔

غزہ پر سات اکتوبر کو ہونے والے حملے کے جواب میں گذشتہ ماہ سے روزانہ اسرائیلی فضائی حملوں میں کم از کم 12 ہزار فلسطینی شہید اور ہزاروں زخمی ہو چکے ہیں۔

فلسطینی صحت کے حکام کے مطابق ہلاک ہونے والوں میں دو تہائی تعداد خواتین اور بچوں کی ہے۔

اقوام متحدہ کے انسانی امور کے دفتر کا اندازہ ہے کہ تقریبا 2700 افراد جن میں 1500 نابالغ بھی شامل ہیں لاپتہ ہیں۔ خیال کیا جاتا ہے کہ وہ اسرائیلی بموں سے تباہ ہونے والی عمارتوں کے کھنڈرات میں دفن ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں