آئی سی سی ون ڈے ورلڈکپ کے فائنل میں آسٹریلیا کے ہاتھوں بدترین شکست پر بھارتی مداحوں کے اوسان خطا ہوگئے۔ 

بھارت کے شہر احمد آباد میں ہونے والے آئی سی سی مینز ون ڈے کرکٹ ورلڈکپ 2023 میں فائنل تک ناقابل شکست رہنے والی بھارتی ٹیم کی آسٹریلیا کے ہاتھوں شکست بھارتی شائقین کرکٹ سے برداشت نہیں ہورہی۔

بھارتی مداحوں کی امید کے برعکس جب آسٹریلیا نے بھارت کو 6 وکٹوں سے شکست دے کر ان کا ورلڈکپ جیتنے کا خواب چکنا چور کیا تو بھارتی شائقین کرکٹ نے سوشل میڈیا پر آسٹریلین کھلاڑیوں کی توہین شروع کردی اور انہیں دھمکیاں دینے لگے۔

سوشل میڈیا پر آسٹریلوی کھلاڑیوں سمیت ان کے اہلخانہ کو دھمکیوں کا نشانہ بنایا جارہا ہے تاہم اس دوران کچھ نا سمجھ بھارتی فینز نے بھارت کے ہاتھوں سیمی فائنل میں شکست کھاکر ایونٹ سے باہر ہونے والی ٹیم نیوزی لینڈ کے آل راؤنڈر جمی نیشم کو آسٹریلوی کھلاڑی سمجھ کر انہیں سوشل میڈیا پر گالیوں بھرے پیغامات بھیجے۔

کیوی آل راؤنڈر  نے انسٹاگرام اکاؤنٹ پر اسکرین شاٹ شیئر کیے جس میں بھارتی اکاؤنٹس کی جانب سے انتہائی غیر اخلاقی زبان کا استعمال کیا گیا، جمی نیشم کے شیئر کردہ اسکرین شاٹس سوشل میڈیا پر وائرل ہوگئے۔

نیشم نے اسکرین شاٹس پر لکھا کہ ’گزشتہ رات میچ نہیں دیکھا لیکن، میرا خیال ہے آسٹریلیا جیت گیا ہے؟‘ لیکن ایسا دکھائی دیتا ہے کہ میں نے کوئی چیز مس کردی۔

اس کے علاوہ کرکٹر کی جانب سے ایک میم شیئر کی گئی جس میں انہوں نے لکھا کہ ‘یہ ان لوگوں کے لیے ہے جو نہیں جانتے کہ آسٹریلیا اور نیوزی لینڈ دو الگ الگ ممالک ہیں’۔

ایک انٹریو کے دوران جمی نیشم کا کہنا تھا کہ مجھے نہیں معلوم ایسی نفرت کہاں سے آتی ہے لیکن بھارتی شائقین کرکٹ کو چاہیے کہ اپنی توانائی کسی اچھی جگہ استعمال کریں، فائنل میں آسٹریلیا ٹاس سے لے کر میچ کی آخری گیند تک بہترین ٹیم تھی اور اس بات کو سب کو تسلیم کرنا پڑے گا۔