عراق کے شہر بغداد میں امریکہ کے سفارت خانے پر مارٹر گولوں سے حملہ کیا گیا ہے۔

عرب میڈیا کے مطابق ایک امریکی فوجی عہدیدار نے خبر رساں ادارے کو بتایا کہ جمعے کی علی الصبح بغداد میں امریکی سفارت خانے کے احاطے میں ہونے والے ایک حملے کے دوران تقریبا سات مارٹر گولے گرے۔

عراق اور شام میں امریکی افواج کو جمعے کے روز کم از کم پانچ بار راکٹوں اور ڈرونز سے نشانہ بنایا گیا۔ ایک امریکی دفاعی عہدیدار نے بتایا کہ تین بار شام میں الگ الگ اڈوں پر جبکہ دو بار بغداد کے مغرب میں عین الاسد ایئر بیس پر حملہ کیا گیا۔

اکتوبر کے وسط کے بعد سے ایک دن میں خطے میں امریکی افواج کے خلاف یہ سب سے زیادہ حملے تھے، جب ایران سے وابستہ ملیشیا نے غزہ میں تباہ کن جنگ میں واشنگٹن کی جانب سے اسرائیل کی پشت پناہی پر عراق اور شام میں امریکی اثاثوں کو نشانہ بنانا شروع کیا تھا۔

سفارت خانے پر ایک سال سے زائد عرصے میں یہ پہلا حملہ ہے جس سے خطے میں تنازعات میں اضافے کے خدشے کے پیش نظر امریکی افواج کے فوجی اڈوں پر درجنوں حملوں کے بعد اہداف کا دائرہ وسیع ہو گیا ہے۔

کسی گروپ نے اس حملے کی ذمہ داری قبول نہیں کی ہے لیکن امریکی افواج کا کہنا ہے کہ اس کے خلاف اس سے قبل بھی حملے ایران سے وابستہ ملیشیا نے کیے ہیں جو عراق میں اسلامی مزاحمت کے جھنڈے تلے کام کر رہی ہیں۔

امریکی فوجی عہدیدار نے نام ظاہر نہ کرنے کی شرط پر اس امکان کو کھلا چھوڑ دیا کہ سفارت خانے کے احاطے پر مزید میزائل داغے گئے لیکن وہ اس کے اندر نہیں گرے۔

امریکی حکام کا کہنا ہے کہ جمعے کے روز ہونے والے حملوں میں کوئی زخمی نہیں ہوا جبکہ سفارت خانے پر حملے میں بہت معمولی نقصان ہوا۔