لاہورکی احتساب عدالت نے سابق وزیرِاعلیٰ پنجاب حمزہ شہبازکی مستقل حاضری معافی کی درخواست پر نیب سے جواب طلب کر لیا۔

تفصیلات کے مطابق جج ملک علی ذوالقرنین اعوان نے سابق وزیرِ اعظم شہباز شریف اورحمزہ شہباز کے خلاف ریفرنس پر سماعت کی۔

حمزہ شہباز حاضری کے لیے عدالت میں پیش ہوئے جبکہ شہباز شریف کے نمائندے انوار حسین بھی عدالت میں پیش ہوئے۔ عدالت نے رمضان شوگرمل ریفرنس میں حمزہ شہباز کی حاضری مکمل کرلی۔

نیب کے وکیل وارث جنجوعہ نے کہا کہ اس کیس میں بریت کی درخواستیں دائر ہوئی تھیں، اب یہ کیس گواہوں کے بیانات سے شروع ہو گا۔ احتساب عدالت نے کارروائی 12 جنوری تک ملتوی کر دی۔

واضح رہے کہ سپریم کورٹ کے حکم پر نیب نے رمضان شوگر ملز کا ریفرنس دوبارہ عدالت جمع کروا دیا تھا۔

حمزہ شہبازکی میڈیا سے گفتگو

پیشی کے موقع پر میڈیا سے گفتگو کرتے ہوئے حمزہ شہبازنے کہا کہ عدالت سے سرخروبھی ہوئےاورعمران نیازی کی حکومت میں جھوٹے کیس بنائے گئے۔ اس حکومت کی دوران بھی ایف آئی اے نے کہا کہ ہمارے پا س کوئی ٹھوس ثبوت نہیں میں اورشہبازشریف بری ہوئے۔

انھوں نے مذید کہا کہ آج نواز شریف بھی با عزت بری ہورہے ہیں، جھوٹے کیس بنا کر قومی خزانے کو نقصان پہنچایاگیا۔  قوم سے جھوٹ بولا گیا جن لوگوں نے جھوٹے کیس بنائے وہ بھی آج کٹہرے میں ہیں۔ اس ملک کا وقت قیمتی ہے اور عوام کا وقت قیمتی ہے،  ہم سب کو مل کر لوگوں کے مستقبل کے حوالے سے جامع حکمت عملی اپنانی چاہیے اورمیں سیاسی کارکن ہوں میری امید اور دعا ہے کہ الیکشن وقت پرہونے چاہییں۔