بھارت میں کورونا ایک بار پھر بے قابو ہونے لگا ہے، ایک دن میں 529 نئے کورونا کیسز درج کئے گئے ہیں، جبکہ 3 افراد ہلاک ہو گئے ہیں۔

خلیجی خبر رساں ادارے کی خبر کے مطابق بھارت کی وزارت صحت نے بتایا کہ بھارت میں ایک ہی دن میں کورونا کے 529 نئے کیسز درج کیے گئے ہیں ، جبکہ ملک میں انفیکشن کی فعال تعداد 4،093 ہے۔

وزارت کے صبح آٹھ بجے تازہ ترین اعداد و شمار کے مطابق گزشتہ 24 گھنٹوں کے دوران تین نئی اموات ہوئی ہیں جن میں سے دو کرناٹک اور ایک گجرات سے ہے۔

5 دسمبر تک یومیہ کیسز کی تعداد دو ہندسوں تک گر گئی تھی ، لیکن ایک نئی قسم اور سرد موسم کے حالات کے سامنے آنے کے بعد انفیکشن میں ایک بار پھر اضافہ ہوا ہے۔

2020 کے اوائل میں شروع ہونے والی وبائی بیماری کے عروج پر روزانہ کی تعداد دسیوں ہزار میں تھی اور اس کے بعد سے ملک بھر میں تقریبا چار سالوں میں 45 ملین سے زیادہ افراد متاثر ہوئے ہیں اور 0.53 ملین سے زیادہ اموات ہوئی ہیں۔

وزارت صحت کی ویب سائٹ کے مطابق اس بیماری سے صحت یاب ہونے والے افراد کی تعداد 44 ملین سے زیادہ ہے اور صحت یابی کی قومی شرح 98.81 فیصد ہے۔

ویب سائٹ کے مطابق ملک میں اب تک کووڈ ویکسین کی 2 ارب 21 کروڑ خوراکیں لگائی جا چکی ہیں جبکہ اموات کی شرح 1.19 فیصد ہے۔