آرمی چیف جنرل سید عاصم منیرنشانِ امتیاز(ملٹری) نے امریکا کے دورے کے دوران اہم امریکی حکومتی عہدیداروں اورعسکری حکام سے ملاقاتیں کی ہیں۔

پاک فوج کے شعبہ برائے تعلقاتِ عامہ انٹرسروسز پبلک ریلیشنز(آئی ایس پی آر) کے مطابق ان اہم ملاقاتوں میں انٹونی جے بلنکن (سیکرٹری آف اسٹیٹ)، جنرل لائیڈ جے آسٹن (ریٹائرڈ) سیکریٹری دفاع کے ساتھ ساتھ وکٹوریہ نولینڈ (نائب وزیرخارجہ)، جوناتھن فائنر(نائب قومی سلامتی مشیر) اور جنرل چارلس کیو براؤن، چیئرمین جوائنٹ چیفس آف اسٹاف شامل ہیں۔

آئی ایس پی آر کے مطابق ملاقاتوں میں دوطرفہ دلچسپی، عالمی اور علاقائی سلامتی کے باہمی امور کے ساتھ ساتھ جاری بین الاقوامی تنازعات پر تبادلہ خیال کیا گیا۔ دونوں اطراف نے مشترکہ مفادات کے حصول کے لئے دوطرفہ تعاون کی ممکنہ کوششیں جاری رکھنے پر اتفاق کیا۔

آرمی چیف جنرل عاصم منیر کا دورہ امریکا
دوطرفہ دلچسپی، عالمی، علاقائی سلامتی کے باہمی امور پر گفتگو
براہ راست دیکھیں:https://t.co/d9lAsOIKwT#BOLNews #ArmyChief pic.twitter.com/m98sMn1I2C

Advertisement

— BOL Network (@BOLNETWORK) December 15, 2023

آئی ایس پی آر کا کہنا ہے کہ دفاعی حکام کے ساتھ ملاقاتوں کے دوران انسداد دہشت گردی اور دفاعی تعاون کے شعبوں کو بنیادی اہمیت دی گئی اوردونوں سائیڈز نے باہمی دلچسپی کے اُمور پر بات چیت جاری رکھنے کا اعادہ کیا۔

آرمی چیف نے علاقائی سلامتی کو درپیش چیلنجز اور جنوبی ایشیا میں علاقائی سلامتی کو متاثر کرنے والے پہلوؤں پر ایک دوسرے کے نقطہ نظر کو سمجھنے کی اہمیت پر بھی زور دیا۔

اس تناظر میں آرمی چیف نے خاص طور پر مسئلہ کشمیر کو بین الاقوامی قانون اور اقوامِ متحدہ کی سلامتی کونسل کی قراردادوں کے مطابق حل کرنے کی اہمیت کو اجاگر کیا۔

آئی ایس پی آر کے مطابق آرمی چیف نے پاکستانی سفارتخانے کے زیر اہتمام استقبالیہ میں بیرون ملک پاکستانی کمیونٹی کے ارکان سے بھی بات چیت کی اورانھوں نے بیرون ملک مقیم پاکستانی کمیونٹی کی ملکی ترقی کے لیے کیے جانے والے مثبت کردار اور کوششوں کو سراہا۔

آرمی چیف نے SIFC کی کامیابیوں کا ذکر کرتے ہوئے بیرون ملک پاکستانیوں کو پاکستان میں سرمایہ کاری کرنے کی دعوت دی اوراس بات پر بھی روشنی ڈالی کہ؛ ’’امریکہ پاکستان کے لیے سب سے بڑی ایکسپورٹ مارکیٹ ہے جو ہماری کل برآمدات کا 21.5 فیصد ہے۔‘‘

آرمی چیف نے بیرون ملک پاکستانیوں کے لیے ویزوں کی رکاوٹ، خصوصی اسکریننگ اور اِس طرح کے دیگر گمراہ کن افواہوں کو رد کرتے ہوئے کہا کہ پاکستان میں بیرون ملک پاکستانیوں کو انتہائی عزت کی نگاہ سے دیکھا جاتا ہے، بیرون ملک پاکستانی، پاکستان کے سفیر اور اثاثہ ہیں۔

آئی آئی ایس پی کی جانب سے جاری بیان میں کہا گیا کہ آخرمیں بیرون ملک پاکستانی کمیونٹی نے کہا کہ افواج پاکستان ہمارا فخر ہیں اور افواج کی پاکستان کے لئیے خدمات کو سراہا۔

آرمی چیف سید عاصم منیرنے بیرون ملک پاکستانی کمیونٹی کے لیے اپنی بہترین خواہشات کا اظہار کیا۔