پاکستان کرکٹ بورڈ نے پاکستان سپر لیگ (پی ایس ایل) کے نویں ایڈیشن کے میچز 4 شہروں میں کروانے کا فیصلہ کیا ہے، جن میں لاہور، کراچی، راولپنڈی اور ملتان شامل ہیں۔

پی سی بی کی جانب سے دیے گئے شیڈول کے مطابق پی ایس ایل 9 کا پہلا میچ 18 فروری کو لاہور میں ہوگا تاہم لیگ کی فرنچائز کی جانب سے شیڈول پر تحفظات کا اظہار کیا گیا ہے کیوں کہ فروری میں سردی اور دھند کے پیش نظر کھلاڑیوں کو مشکلات کا سامنا کرنا پڑسکتا ہے۔

کچھ فرنچائز کراچی میں 19 مارچ کو شیڈول فائنل سے بھی مطمئن نہیں ہیں کیوں کہ ان کا خیال ہے کراچی میں شائقین کی تعداد کم ہونے سے ٹکٹ سے ملنے والے ریونیو پر بھی اثر پڑے گا۔ اس حوالے سے ملتان سلطانز کی جانب سے تجویز دی گئی ہے کہ فائنل کراچی کے بجائے ملتان میں کروایا جائے، جہاں انہوں نے بورڈ کو گراؤند کو مکمل طور پر بھرنے کی یقین دہانی بھی کروائی ہے۔

ذرائع نے بتایا ہے کہ پشاور زلمی پی ایس ایل کے نویں ایڈیشن کے کچھ میچز پشاور میں کروانے کی بھی خواہش مند ہے اور فرنچائز کا خیال ہے کہ پشاور کا ارباب نیاز کرکٹ اسٹیڈیم مکمل طور پر تیار ہوگیا ہے اور جو تھوڑا بہت کام رہ گیا ہے وہ دو ماہ  کے اندر مکمل ہوجائے گا تاہم اس حوالے سے پی سی بی نے اب تک کوئی فیصلہ نہیں کیا جس پر پشاور زلمی کے مالک جاوید آفریدی نے تحفظات کا اظہار بھی کیا تھا۔

دوسری جانب ماہ رمضان میں پی ایس ایل کے ایک ہی دن میں دو میچز پر بھی فرنچائزز کی جانب سے اعتراض کیا گیا ہے تاہم پی سی بی کی جانب سے  لیگ کا حتمی شیڈول کا اعلان 13 دسمبر کو متوقع ہے، جس دن پی ایس ایل پلیئرز ڈرافٹنگ کی تقریب ہوگی۔

واضح رہے کہ الیکشن کمیشن آف پاکستان کی جانب سے 8 فروری کو ملک میں عام انتخابات کے انعقاد کا اعلان کیا گیا ہے اس دوران یہ خبریں بھی سامنے آئی تھیں کہ پی ایس ایل کو یو اے ای منتقل کردیا جائے گا تاہم پی سی بی نے مکمل پی ایس ایل پاکستان میں ہی کروانے کا فیصلہ کیا ہے۔