پاکستان کرکٹ ٹیم سلپ میں کیچ پکڑنے میں دیگر ٹیموں سے بہت پیچھے رہ گئی۔ 

پاکستان اور آسٹریلیا کے درمیان میلبرن ٹیسٹ میں پاکستان ٹیم کی بولنگ کی تعریف تو کی گئی لیکن فیلڈنگ میں اگر کچھ غلطیاں نہ ہوتیں تو یقیناً پاکستان یہ میچ جیت کر آسٹریلیا میں ٹیسٹ سیریز جیتنے کا خواب پورا کرسکتا تھا لیکن فیلڈنگ اور بیٹنگ کی ناکامی قومی ٹیم کو لے ڈوبی۔

حالیہ ٹیسٹ سیریز عبداللہ شفیق کیلیے ڈراؤنا خواب ثابت ہوئی۔ وہ سلپ میں اب تک صرف ایک کیچ پکڑچکے ہیں لیکن اس دوران انہوں نے 4 اہم مواقع پر کیچز چھوڑے۔ پرتھ ٹیسٹ کے پہلے روز عبداللہ نے آسٹریلوی اوپنر عثمان خواجہ کو 21 پر موقع دیا۔

قومی ٹیم کے اوپننگ بلے باز عبداللہ شفیق نے میلبرن ٹیسٹ کی پہلی اننگز میں ڈیوڈ وارنر کا کیچ چھوڑا جنہوں نے بعد میں نصف سنچری اسکور کی۔

بعد ازاں پریس کانفرنس کے دوران عبداللہ شفیق نے اپنی غلطی تسلیم کرتے ہوئے کہا کہ کوئی بھی فیلڈر جان بوجھ کر کیچ نہیں چھوڑتا لیکن انہوں نے وہی غلطی دوسری اننگز میں دوبارہ دہرائی۔

جب مچل مارش کا کیچ چھوڑا اور پھر انہوں نے نہ صرف نصف سنچری بنائی بلکہ پاکستانی بولرز کی خوب درگت بنائی۔ اس کے علاوہ انہوں نے جوش ہیزل ووڈ کا کیچ بھی چھوڑ چکے ہیں۔

مجموعی طور پر عبداللہ شفیق کے ڈراپ کیچز کی وجہ سے میزبان ٹیم کو 137رنز اضافی بنانے کا موقع ملا، بالآخر کپتان شان مسعود نے ان کو سلپ سے ہٹایا اور بابر اعظم کو لے آئے۔

مجموعی طور پر نظر ڈالی جائے تو پاکستان سلپ کیچنگ میں دیگر ٹیموں سے بہت پیچھے ہے اور اس فہرست میں وہ بنگلادیش اور ویسٹ انڈیز کی ٹیموں سے بھی پیچھے۔

گذشتہ 3 سال کے ریکارڈز کے مطابق جنوبی افریقہ 89 فیصد کیچز تھام کر اس فہرست میں ٹاپ پر ہے۔  بھارت 87.5 فیصد کے ساتھ دوسرے، نیوزی لینڈ 85.7 تیسرے، بنگلہ دیش 85.7 چوتھے، ویسٹ انڈیز 79.5 پانچویں، انگلینڈ 78.3 چھٹے، آسٹریلیا 76.8 ساتویں، پاکستان 72.4 آٹھویں اور سری لنکا 72.0 فیصد کے ساتھ نویں نمبر پر ہے۔