کراچی میں آتشزدگی کا ایک اور واقعہ تولیہ فیکٹری میں لگی آگ پر قابو پالیا گیا آگ سے کوئی جانی نقصان نہیں ہوا۔

عینی شاہد ورکرنے دعوی کیا کہ آگ شارٹ سرکٹ کے باعث لگی ہے، کھڑکیوں کو گتے سے ڈھکا گیا تھا جس سے آگ اندر پھیل گئی، چھ سے سات سو مزدور کام کرتے ہیں جن میں بچے بھی شامل ہیں۔

فائر آفیسر کورنگی صنعتی ایریا کا کہنا ہے کہ آگ لگنے کی اطلاع صبح 8:50 پر ملی، ابتدائی طور پر دو فائر ٹینڈرز موقع پر پہنچے تھے۔ آگ کی شدت کو دیکھتے ہوئے مزید 3 فائر ٹینڈرز طلب کیے گئے۔ مجموعی طورپر5 فائر ٹینڈرزکی مدد لی گئی۔

فیکٹری میں بڑی تعداد میں تولیہ اور گتا موجود تھا۔ آگ فیکٹری کی پہلی اور دوسری منزل پر لگی، پہلی منزل پر لگنے والی آگ پر قابو پانے کے بعد دوسری منزل کی آگ کو بجھانے کے لیے آپریشن جاری رہا۔ آگ لگنے کی وجوہات تاحال معلوم نہ ہوسکی، تحقیقات جاری ہیں۔

دوسری جانب  اورنگی ٹاؤن پاکستان بازارمیں گتے کے کارخانے میں بھی آگ لگ گئی جہاں فائربریگیڈ کی 2 گاڑیوں نے آگ بجھائی۔  اورنگی ٹاؤن شاہ فیصل چوک کے قریب گتے کے کارخانے میں لگنے والی اگ پر قابو پا لیا گیا تاہم آتشزدگی کے نتیجے میں کارخانے میں موجود گتہ جل گیا۔

فائر بریگیڈ کی دو گاڑیوں نے موقع پر پہنچ کر آگ پر قابو پایا۔ فوری طور پرآگ لگنے کی وجہ معلوم نہ ہو سکی۔