سپریم کورٹ نے بلوچستان کے حلقہ پی بی 12 میں حلقہ بندی سے متعلق نظرثانی کی درخواست خارج کردی۔

تفصیلات کے مطابق عدالتِ عظمٰی میں درخواست پرسماعت کے دوران قائم مقام چیف جسٹس سردارطارق مسعود نے ریمارکس دیے کہ عام انتخابات کی تاریخ آنے سے ملک میں تھوڑا استحکام آیا ہے، کیا آپ ملک میں استحکام نہیں چاہتے؟ عام انتخابات کی تاریخ آنا کوٸی معمولی بات نہیں۔

وکیل درخواست گزارقمرافضل نے کہا کہ انتخابی حلقہ بندی کے حوالےسےغلط فیصلہ کیا گیا جس پرجسٹس منصورعلی شاہ نے کہا کہ  الیکشن پروگرام جاری ہو چکا اب کچھ نہیں ہوسکتا، انفرادی درخواستوں پر فیصلہ دینے لگ گئے تو الیکشن عمل متاثرہوگا۔ ایسی درخواستوں پر عام انتخابات کیلئے 8فروری کی تاریخ کو ڈسٹرب نہیں کرینگے۔

جسٹس منصور علی شاہ نے درخواست گزاروکیل سے مکالمہ کرتے ہوئے کہا کہ اگر آپ انتخابات وقت پر نہیں چاہتے تو عدالت میں بیان دیں، الیکشن کو کسی صورت ڈی ریل نہیں ہونے دینگے۔

جسٹس اطہرمن اللہ نے کہا کہ انتخابات میں کوٸی تاخیر نہیں ہونی چاہیے، کسی کو الیکشن تاخیر کا شکار کرنے کی اجازت نہیں دینگے۔

سپریم کورٹ نے بلوچستان کے حلقہ پی بی 12میں حلقہ بندی سے متعلق نظرثانی درخواست خارج کرتے ہوئے کہا کہ الیکشن شیڈول جاری ہونے کے بعد انتخابی حلقہ بندیاں تبدیل نہیں ہوسکتی۔

درخواست گزارامیر خان نے بلوچستان ہاٸی کورٹ فیصلے کیخلاف سپریم کورٹ رجوع کیا تھا جس پرقاٸم مقام چیف جسٹس سردار طارق مسعود کی سربراہی میں تین رکنی بنچ نے سماعت کی۔