لاہورہائی کورٹ نے پرویزالہی کو عدالتی حکم کے باوجود گرفتار کرنے کے خلاف دائر توہین عدالت کی درخواست کا تحریری حکم جاری کردیا۔

عدالت نے آئی جی اسلام آباد کے ورانٹ بحال رکھے، تحریری حکم نامے میں کہا گیا کہ سیکریٹری اسٹیبلشمنٹ اسلام آباد کو تحریری حکم نامےکی کاپی ارسال کی جائے، سیکریٹری اسٹیبلشمنٹ اسلام آباد اس معاملے پرعدالتی معاونت کے لیے کوئی افسرمقررکرے۔ شک ہے کہ آئی جی اسلام آباد اور ایس ایس پی کو دائرہ اختیار کا غلط مشورہ دیا گیا۔

عدالتی حکم نامے میں کہا گیا کہ آئی جی اسلام آباد اور ایس ایس پی کے بار بار وارنٹ گرفتاری اور ناقابل ضمانت وارنٹ جاری کیے، دونوں افسران عدالت پیش نہ ہوئےاورنہ ہی کوئی جواب دیا۔

جسٹس سلطان تنویراحمد نے قیصرہ الہی کی درخواست پر سماعت کا تحریری حکم جاری کیا، مزید سماعت 18 دسمبر کوہوگی۔

اس سے قبل لاہور ہاٸیکورٹ میں سابق وزیراعلٰی پنجاب کوکرپشن کےمقدمے سے ڈسچارج کرنے کے فیصلےکوکالعدم قراردینےکے معاملے پرچوہدری پرویزالہی کی سنگل بنچ کے فیصلے کےخلاف اپیل کی سماعت بھی ہوئی۔

لاہور ہائیکورٹ کےجسٹس شہرام سرور چویدری کی سربراہی میں ڈویژن بنچ نے سماعت کرتے ہوئے درخواست کے قابل سماعت ہونے پر فریقین کے وکلاء سے دلائل طلب کر لیے۔

ایڈووکیٹ جنرل پنجاب کے پیش نہ ہونے پرسماعت اگلے سال 15 جنوری تک ملتوی کردی گئی۔