امتحان میں صرف 90 سیکنڈ قبل امتحانی کاپیاں واپس لینے پر جنوبی کوریا کے طلباء نے عدالت سے رجوع کر لیا ہے۔

برطانوی خبر رساں ادارے کی خبر کے مطابق جنوبی کوریا کے طالب علموں کے ایک گروپ نے حکومت کے خلاف مقدمہ دائر کیا ہے کیونکہ ان کے کالج میں داخلے کا امتحان مقررہ وقت سے 90 سیکنڈ پہلے ختم ہوا تھا۔

طلباء 15400 ڈالر ہرجانے کا مطالبہ کر رہے ہیں، ان کا کہنا ہے کہ انہوں نے اپنی ایک سال کی پڑھائی میں لاکھوں روپے خرچ کئے تھے۔

طلباء کے وکیل کا کہنا ہے کہ اس غلطی نے باقی طالب علموں کے امتحانات کو متاثر کیا۔

جنوبی کوریا کا بدنام زمانہ کالج داخلہ ٹیسٹ جسے سنیونگ کے نام سے جانا جاتا ہے، طلباء کے لیے 8 گھنٹے کی میراتھن ہے جس میں متعدد مضامین میں بیک ٹو بیک پرچے ہوتے ہیں۔

جنوبی کوریا کے سنیونگ ٹیسٹ کو دنیا کے مشکل ترین امتحانات میں سے ایک مانا جاتا ہے۔

سنیونگ ٹیسٹ نہ صرف یونیورسٹی کی جگہوں اور ملازمتوں کا تعین کرتا ہے بلکہ مستقبل کے تعلقات کا بھی تعین کرتا ہے۔

سالانہ ایونٹ کے دوران طلباء کی توجہ مرکوز کرنے میں مدد کے لئے متعدد اقدامات کیے جاتے ہیں جیسے ملک کی فضائی حدود کو بند کرنا اور اسٹاک مارکیٹ کے کھلنے میں تاخیر کرنا شامل ہے۔

اس سال کے امتحانات کے نتائج 8 دسمبر کو جاری کیے گئے تھے۔

گزشتہ روز کم از کم 39 طالب علموں کی جانب سے دائر کیے گئے مقدمے میں دعویٰ کیا گیا ہے کہ دارالحکومت سیئول میں ایک امتحانی مقام پر 90 سیکنڈ سے قبل گھنٹی بجی تھی۔

کچھ طالب علموں نے فوری طور پر احتجاج کیا، لیکن ان کا کہنا ہے کہ سپروائزر ان کی امتحانی کاپیاں ساتھ لے گئے ہیں۔

اساتذہ نے اگلے سیشن کے آغاز سے پہلے غلطی کا اعتراف کیا اور دوپہر کے کھانے کے وقفے کے دوران ڈیڑھ منٹ واپس دے دیے، لیکن طلباء اپنی امتحانی کاپیوں پر صرف خالی کالموں کو نشان زد کر سکے اور انہیں کسی بھی موجودہ جواب کو تبدیل کرنے کی اجازت نہیں دی گئی۔

جنوبی کوریا کی نیوز ایجنسی کی رپورٹ کے مطابق، طالب علموں نے کہا کہ وہ اتنے پریشان تھے کہ وہ باقی امتحان پر توجہ مرکوز نہیں کر سکتے تھے۔ کچھ طلباء نے مبینہ طور پر ہار مان لی اور گھر لوٹ آئے۔

طلباء کے وکیل کم وو سک نے مقامی میڈیا کو بتایا کہ تعلیمی حکام نے معافی نہیں مانگی ہے۔

سرکاری نشریاتی ادارے کے بی ایس نے حکام کے حوالے سے بتایا کہ مخصوص ٹیسٹ سینٹر کے انچارج سپروائزر نے وقت کا غلط استعمال کیا۔

یہ پہلا موقع نہیں ہے جب طالب علموں نے وقت سے پہلے امتحانی کاپیاں واپس لینے پر مقدمہ کیا ہے۔

اس سے قبل ایک عدالت نے 2021 میں سنیونگ امتحان میں وقت ختم ہونے سے دو منٹ قبل امتحان ختم ہونے پر طالب علموں  کو 5250 ڈالر ہرجانہ ادا کیا تھا۔