آسٹریلیا کے اسٹار بلے باز گلین میکسویل کا کہنا ہے کہ وہ جب تک چلنے کے قابل رہیں گے، تب تک آئی پی ایل کھیلتے رہیں گے۔

بھارت میں ہونے والے ورلڈکپ کی فاتح ٹیم کے رکن  گلین میکسویل نے آسٹریلیا واپس آنے پر میلبرن ائیرپورٹ پر میڈیا سے گفتگو کرتے ہوئے کہا کہ میرے پروفیشنل کیریئر میں آئی پی ایل میرے لیے کافی اچھا رہا، جن لوگوں سے میں ملا ہوں، جن کوچز کے ساتھ میں کھیل چکا ہوں وہ سب شاندار تھے۔

انہوں نے کہا کہ شاید آئی پی ایل وہ آخری ٹورنامنٹ ہو گا جو میں اپنی زندگی میں کھیلوں گا کیونکہ میں آئی پی ایل اس وقت تک کھیلتا رہوں گا جب تک چلنے کے قابل ہوں کیوں کہ آئی پی ایل میں جو بین الاقوامی کھلاڑی آپ کے ساتھ ٹیم میں ہوتے ہیں ان کے ساتھ کافی اچھا تجربہ ہوتا ہے، یہ ٹورنامنٹ میرے پورے کیریئر کے لیے بہت فائدہ مند رہا۔

گلین میکسویل نے کہا دو ماہ تک آپ ویرات کوہلی اور اے بی ڈی ویلیئرز جیسے کھلاڑیوں کے ساتھ کندھے سے کندھا ملا کر کھیلتے ہیں، دوسرے میچز دیکھتے ہوئے ان سے گفتگو کرتے ہیں، یہ سیکھنے کا سب سے بڑا تجربہ ہے جس کی ہر کھلاڑی کو چاہت ہوتی ہے۔

واضح رہے کہ گلین میکسویل نے سال 2012 میں پہلی مرتبہ دہلی ڈیئر ڈیولز (کیپٹلز) کئ لیے پہلا سیزن کھیلا تھا، بعدازاں وہ ممبئی انڈینز کا حصہ بنے۔ آل راؤنڈر گزشتہ تین سالوں سے رائل چیلنجر بنگلور کی ٹیم کا حصہ ہیں، جنہیں پچھلے سال 14.25 بھارتی کروڑ روپے میں خریدا گیا۔