نائیجیریا کی پولیس نے دعویٰ کیا ہے کہ کامیاب آپریشن کے بعد یرغمال 5 بہنوں کو بحفاظت بازیاب کرا لیا گیا ہے۔

برطانوی خبر رساں ادارے کی خبر کے مطابق نائجیریا کی پولیس کا کہنا ہے کہ انہوں نے ملک کے دارالحکومت میں اغوا کے بعد یرغمال بنائی گئی پانچ بہنوں کو کامیابی کے ساتھ بازیاب کرا لیا ہے۔

ان لڑکیوں کو ہفتے کی رات شمالی نائجیریا کے ایک جنگل میں پولیس اور فوج کے مشترکہ آپریشن کے دوران رہا کیا گیا تھا۔

ان بہنوں کو اس ماہ کے اوائل میں ابوجا میں ان کے گھر سے ایک اور بہن کے ساتھ لے جایا گیا تھا جسے بعد میں قتل کر دیا گیا تھا۔

اغوا کاروں نے ان کی رہائی کے لیے تاوان کا مطالبہ کیا تھا، لیکن پولیس نے بیان میں کسی کی ادائیگی کا کوئی ذکر نہیں تھا۔

نائجیریا کی پولیس کا کہنا ہے کہ مقامی وقت کے مطابق ساڑھے گیارہ بجے ریاست کادونا کے کاجورو جنگل کے قریب ہونے والی اس کارروائی کے بعد لڑکیوں کو ان کے اہل خانہ سے ملا دیا گیا ہے۔

ان چھ بہنوں کو 2 جنوری کو ان کے والد منصور الکدریار کے ساتھ ابوجا کے مضافاتی علاقے بواری میں ان کے گھر میں یرغمال بنا لیا گیا تھا۔

عینی شاہدین کا کہنا ہے کہ لڑکیوں کے چچا مدد کے لیے بھاگے لیکن ان پر گھات لگا کر حملہ کیا گیا اور تین پولیس اہلکاروں کو ہلاک کر دیا گیا۔

نام ظاہر نہ کرنے کی شرط پر غیر ملکی خبر رساں ادارے سے بات کرتے ہوئے خاندان کے ایک رکن نے بتایا کہ اغوا کاروں نے منصور کو اس شرط پر رہا کیا کہ وہ تاوان کی بڑی رقم جمع کرے گا۔

لیکن اغواکاروں نے اس کی 21 سالہ بیٹی نبیحہ جو یونیورسٹی کے آخری سال کی طالبہ تھی، کو وارننگ کے طور پر قتل کر دیا گیا۔