نگراں وفاقی وزیراطلاعات کا کہنا ہے کہ عدلیہ کےخلاف گھٹیا مہم کی اجازت نہیں دی جاسکتی، کسی بھی مہم میں ملوث عناصر کیخلاف کارروائی کریں گے۔

اسلام آباد میں پی ٹی اے اورایف آئی اے حکام کے ساتھ نیوز کانفرنس کرتے ہوئے نگراں وفاقی وزیراطلاعات مرتضٰی سولنگی نے کہا ہے کہ ملک آئین کے تحت چلتا ہے، آئین کے تحت ہی نگراں حکومت قائم ہوئی۔

مرتضیٰ سولنگی نے کہا کہ پاکستان کی قومی و صوبائی اسمبلیوں کے انتخابات 8 فروری کو ہوں گے۔ پاکستان کے عوام نئی آئینی حکومت منتخب کریں گے۔

نگراں وفاقی وزیراطلاعات نے کہا ک جھوٹ اورعدم برداشت کا کلچر نقصان دہ ہے، کئی 100اکاؤنٹس کومانیٹرکیا گیا، ان کے خلاف کارروائی ہوگی۔

مرتضیٰ سولنگی نے نیوزکانفرنس میں کہا کہ عدلیہ مخالف مہم کےخلاف جے آئی ٹی تشکیل دی گئی ہے، 16جنوری کو وزرات داخلہ نے نوٹیفکیشن جاری کیا۔

مرتضیٰ سولنگی نے کہا کہ تحقیقاتی ادارے اپنی کارروائی جاری رکھے ہوئے ہیں، عدالتی فیصلے عوام کی ملکیت ہوتے ہیں، عدلیہ کے خلاف گھٹیا مہم چلائی گئی، عدلیہ کےخلاف گھٹیا مہم کی اجازت نہیں دی جاسکتی۔

ایف آئی حکام نے نیوز کانفرنس میں کہا کہ کسی کو ملکی سلامتی داؤ پر لگانے کی اجازت نہیں دینگے، سوشل میڈیا پر متعدد اکاؤنٹس کی مانیٹرنگ کررہےہیں۔ سائبر کرائم ونگ مکمل طور پر چوکنا ہے۔

پی ٹی اے حکام نے بھی نیوز کانفرنس میں کہا کہ پی ٹی اے کے پاس مواد کو بلاک کرنے کا اختیارہے۔