بلوم برگ نے گزشتہ تین دہائیوں میں سابق وزیراعظم نواز شریف کی معاشی کارکردگی کو سیاسی مخالفین کے مقابلے میں بہترین قرار دے دیا۔

عالمی مالیاتی خبررساں ادارے بلوم برگ نے پاکستان سے متعلق معاشی تجزیاتی رپورٹ جاری کردی جس کے مطابق سابق وزیراعظم اور مسلم لیگ (ن) کے قائد نواز شریف کے ادوار میں معاشی کارکردگی بہترین رہی۔

بلوم برگ کی رپورٹ میں بتایا گیا کہ گزشتہ تین دہائیوں کے دوران نوازشریف نے بہترین انداز میں معیشت سنبھالی، معاشی مشکلات کی درجہ بندی میں نوازشریف نے اپنے سیاسی حریفوں پی ٹی آئی اور پیپلزپارٹی سے بہتر کارکردگی دکھائی۔

خیال رہے کہ بلوم برگ  کی جانب سے جاری معاشی تجزیاتی رپور ٹ میں مزری انڈیکس میں مہنگائی، بیروزگاری اور دیگر معاشی مشکلات کو دیکھ کر کسی حکومت کی معاشی کارکردگی کا تجزیہ اور موازنہ کیا جاتا ہے۔ حالیہ رپورٹ میں 1990 سے اب تک کے ادوار میں سیاسی حکومتوں کی معاشی کارکردگی کا جائزہ لیا گیا۔

رپورٹ میں بتایا گیا کہ حالیہ سروے میں بانی پی ٹی آئی57 فیصد اور نوازشریف مقبولیت میں 52 فیصد پر ہیں جب کہ گزشتہ 6 ماہ میں نوازشریف کی مقبولیت میں 36 فیصد اضافہ ہوا تاہم بانی پی ٹی آئی اب بھی مقبول سیاستدان ہیں لیکن جیل میں ہیں، نوازشریف  8 فروری کو اقتدار کے لیے تیار دکھائی دیتے ہیں۔

بلوم برگ اکنامکس رپورٹ میں شامل مانوک شکلہ نے اپنے تجزیے میں کہا ہے کہ عوام نوازشریف کو شک کا فائدہ دے رہے ہیں تاہم انتخابات جیتنے والی کسی جماعت کیلئے آگے کا سفر آسان نہیں ہوگا۔

رپورٹ میں بتایا گیا کہ اس وقت مہنگائی ریکارڈ بلندی پر ہے، بیروزگاری بڑھ چکی ہے، مہنگائی 30 فیصد کےقریب ہے، گزشتہ برس فارن ایکسچینج ریزروز انتہائی بری حالت میں تھے۔

رپورٹ میں مزید کہا گیا کہ پاکستان اس وقت آئی ایم ایف کے بیل آﺅٹ پیکج پر انحصار کررہا ہے، ایسے میں آنے والی حکومت کو عوام میں غیرمقبول پالیسیوں کو اختیار کرنا پڑ سکتا ہے، سبسڈیز کا خاتمہ اور ٹیکسوں میں اضافہ کرنا پڑ سکتا ہے۔