عالمی ادارہ صحت (ڈبلیو ایچ او) نے دعویٰ کیا ہے دنیا بھر میں تمباکو نوشی کرنے والوں کی تعداد میں کمی واقع  ہوئی ہے۔

عالمی ادارہ صحت (ڈبلیو ایچ او) کی جانب سے جاری کردہ رپورٹ میں کہا گیا ہے کہ تمباکو بنانے والی بڑی کمپنیز لوگوں کو تمباکو نوشی کی جانب مائل کرنے کی کوششوں میں ناکام ہو رہی ہیں ۔

رپورٹ میں کہا گیا کہ دنیا بھر میں نئی نسل میں تمباکو نوشی میں ڈرامائی طور پر کمی آرہی ہے۔

عالمی ادارہ صحت کی رپورٹ میں بتایا گیا کہ سن 2000 میں ہر تین میں سے ایک شخص تمباکو نوشی کرتا تھا، اس کے مقابلے میں اب ہر پانچ میں سے ایک شخص تمباکو نوشی کرتا ہے۔

رپورٹ میں بتایا گیا کہ سن 2000 میں دنیا بھر میں پندرہ سال یا اس سے زائد عمر کے تقریباً ایک ارب 36 کروڑ افراد تمباکو نوشی کرتے تھے جبکہ سن 2022 میں یہ تعداد کم ہو کر ایک ارب 25 کروڑ تک رہ گئی ہے۔

رپورٹ میں امکان ظاہر کیا گیا ہے کہ سن 2030 تک یہ تعداد مزید کم ہو کر ایک ارب دو کروڑ افراد تک رہ جائے گی۔

اس کے باجود رپورٹ میں خبردار کیا گیا ہے کہ لوگوں کو اس مضر صحت مادے کی لت سے چھڑانے کے لیے ابھی مزید  بہت کچھ کرنے کی ضرورت ہے۔

عالمی ادارہ صحت کی رپورٹ کے مطابق  تمباکو نوشی کرنے والوں کی تعداد جنوب مشرقی ایشیا اور یورپ میں سب سے زیادہ ہے۔  مصر، اردن اور انڈونیشیا سمیت چند ممالک میں تمباکو کا استعمال اب بھی  کم ہونے کے بجائے بڑھ رہا ہے۔

رپورٹ میں کہا گیا ہے کہ یہ ایک محتاط اندازہ ہے کیونکہ 70 سے زائد ممالک نے تمباکو نوشی کے حوالے سے کوئی اعدادو شمار فراہم نہیں کیے۔

عالمی ادارہ صحت کی رپورٹ میں انکشاف کیا گیا کہ  دنیا بھر میں تمباکو کے استعمال سے ہر سال 80 لاکھ سے زائد افراد ہلاک ہوجاتے ہیں۔ یہاں قابل ذکر بات یہ ہے کہ ایک اندازے کے مطابق ان ہلاک ہونے والوں میں سے تقریباً 13 لاکھ وہ ہوتے ہیں جو تمباکو نوشی نہیں کرتے۔