بھارت میں ایک میچ کے دوران فاسٹ بولر اندل سنگھ اپنے اوور کے دوران ہی دل کا دورہ پڑنے سے ہلاک ہوگیا۔

کرکٹ میں اکثر ایسے واقعات دیکھنے میں آتے ہیں جو جان لیوا ثابت ہوتے ہیں ۔ 2014 میں سڈنی میں ایک فرسٹ کلاس میچ کے دوران آسٹریلیا کے بلے باز فل ہیوز سر پر گیند لگنے کی وجہ سے زخمی ہوئے اور بعد ازاں ان کی موت ہوگئی۔

بھارت سمیت دنیا بھر کے ڈومیسٹک میں کم انتظامات کی وجہ سے اکثر ایسے واقعات دیکھنے میں آتے ہیں۔ حال ہی میں پاکستان کپ کے دوران قومی ٹیم کے آل راؤنڈر شاداب خان بھی گیند لگنے سے ان فٹ ہوگئے تھے لیکن پی سی بی کی جانب سے انتظامات نہ ہونے کے سبب انہیں اسٹریٹچر کے بجائے ساتھی کھلاڑی کندھے پر اٹھاکر باہر لے گئے تھے جس پر بورڈ جو شدید تنقید کا سامنا کرنا پڑا تھا۔

حال ہی میں بھارت میں ایک واقعہ پیش آیا ہے جہاں بھارتی ریاست مدھیا پردیش کے ضلع کھرگون کے گاؤں میں ہونے والے کرکٹ میچ کے دوران فاسٹ بولر اندل سنگھ دل کا دورہ پڑنے سے اپنی جانب گنوا بیٹھا۔

رپورٹس کے مطابق 22 سالہ فاسٹ بولر اندل سنگھ اپنی بولنگ میں مصروف تھے کہ اچانک انہیں بے چینی محسوس ہوئی اور وہ بے ہوش ہوگئے جس پر انہیں فوراً اسپتال پہنچایا گیا جہاں ان کی موت واقع ہوگئی۔

طبی عملے کے مطابق نوجوان کی موت دل کا دورہ پڑنے سے ہوئی، لاش پوسٹ مارٹم کے بعد اہل خانہ کے حوالے کر دی گئی ہے۔

دوسری جانب ساتھی کھلاڑیوں نے بتایا کہ میچ کے دوران اس نے سینے میں درد کی شکایت کی تھی لیکن اسے نظر انداز کرکے وہ میچ کھیلنے لگ گیا تھا۔

چند ماہ قبل بھارتی شہر حیدرآباد دکن سے تعلق رکھنے والا کھلاڑی عاطف خان سعودی عرب میں میچ میں بیٹنگ کرتے ہوئے پِچ پر دل کا دورہ پڑنے سے انتقال کرگیا تھا۔

ساتھی کھلاڑی عاطف خان کو فوراً قریبی کلینک لے کر گئے لیکن آکسیجن لیول کم ہونے کی وجہ سے وہ چل بسے۔ ڈاکٹروں نے ان کی موت کی وجہ دل کا دورہ قرار دی تھی۔