اسٹیٹ بینک نے تمام مالیت کے نئے نوٹ لانے کا فیصلہ کیا ہے۔

تفصیلات کے مطابق گورنر اسٹیٹ بینک آف پاکستان جمیل احمد نے پریس کانفرنس کے دوران معاشی اعدادوشمار کا جائزہ لیتے ہوئے مانیٹری پالیسی کا اعلان کر دیا ہے۔

گورنر سٹیٹ بینک کے مطابق شرح سود 22 فیصد پر برقرار رکھنے کا فیصلہ کیا گیا ہے، پاکستان کا کرنٹ اکاؤنٹ خسارہ کمی کے بعد 0.7 فیصد پر آگیا جبکہ کرنٹ اکاونٹ خسارہ2022 میں 17ارب ڈالر تھا۔

انہوں نے کہا کہ اس وقت زرمبادلہ ذخائر8.3 ارب ڈالر ہوگئے ہیں، اس کے علاوہ ایکسٹرنل اکاؤنٹ کی صورتحال بھی بہتر ہوئی ہے۔

گورنر اسٹیٹ بینک کے مطابق پچھلے6 ماہ میں ہمارے ریزرو بڑھ گئے ہیں، تمام قسم کی ادائیگی کے باوجود ہمارے ذخائر 4 ملین اضافے سے 8 ارب ڈالر ہیں، حکومتی اقدامات سے کرنٹ اکاؤنٹ خسارہ 0.7 فیصد تک کم ہوا ہے۔

جمیل احمد نے کہا کہ مئی 2023 میں مہنگائی کی شرح بلند ترین سطح پر تھی، اب آہستہ آہستہ کمی آنا شروع ہوئی ہے، ملک میں مہنگائی کی شرح 29 فیصد ہے۔

انہوں نے کہا کہ مارچ کے بعد سے قوی امید ہے مہنگائی کی شرح میں مزید کمی آئے گی، اور سال 2024 کے اختتام تک مہنگائی کی شرح 23 سے 25 فیصد رہے گی۔

گورنر اسٹیٹ بینک نے کہا کہ پہلے ہم نے20 سے 22 فیصد مہنگائی کا تخمینہ لگایا تھا، انڈسٹری کی پیداواری صلاحیت میں اب بہتری ہورہی ہے، انڈسٹری کی جانب سے معاشی سرگرمیوں کو مثبت لیا ہے، رواں مالی سال معاشی نمو 2 سے 3 فیصد تک رہنے کی توقع ہے۔