قومی کرکٹر شعیب ملک ٹی ٹوئنٹی کرکٹ میں 13 ہزار رنز مکمل کرنے والے پہلے ایشین کھلاڑی بن گئے ہیں۔

پاکستان کرکٹ ٹیم کے سابق کپتان اور تجربہ کار کھلاڑی شعیب ملک حال ہی میں اداکارہ و ماڈل ثناء جاوید کے ساتھ شادی کے بندھن میں بندھ گئے ہیں۔

https://twitter.com/realshoaibmalik/status/1748588432366936242

شادی کی تصدیق قومی کرکٹر کی جانب سے سماجی رابطے کی سائٹ ایکس پر کردی گئی ہے جب کہ ان کی اہلیہ نے بھی شادی کے بعد اپنا نام تبدیل کردیا ہے۔

شادی کے فوری بعد شعیب ملک نے ٹی ٹوئنٹی کرکٹ میں 13 ہزار رنز مکمل کرکے اہم اعزاز اپنے نام کیا جب کہ وہ 13 ہزار رنز مکمل کرنے والے پہلے ایشین کھلاڑی بھی بن گئے۔

خیال رہے کہ شعیب ملک ان دنوں بنگلادیش میں ہونے والی پریمیئر لیگ کھیلنے میں مصروف ہیں، جہاں وہ فورچیون باریشال کی نمائندگی کررہے ہیں۔

انہوں نے یہ کارنامہ ٹی ٹوئنٹی کیریئر کی 487 ویں میں انجام دیا جب کہ قومی کرکٹر نے رانگپور کے خلاف 7 رنز بنانے کے بعد اپنے 13 ہزار رنز مکمل کیے۔

ٹی ٹوئنٹی کرکٹ میں سب سے زیادہ رنز ویسٹ انڈیز کے سابق کھلاڑی کرس گیل کے ہیں جنہوں نے اپنے ٹی ٹوئنٹی کیریئر میں 14 ہزار 562 رنز بنائے ہیں۔

واضح رہے کہ ٹی ٹوئنٹی کرکٹ میں شعیب ملک دنیا بھر میں سب سے زیادہ رنز بنانے والے دوسرے کھلاڑی ہیں۔