بلاول بھٹو زرداری نے کہا ہے کہ چند سینیٹرزکی قرارداد اہم ہے یا چیف جسٹس کا فیصلہ؟ چیف جسٹس نے کہا کہ 8 فروری انتخابات کی تاریخ پتھر پرلکیر ہے۔ 

سپریم کورٹ کے باہرمیڈیا سے گفتگو کرتے ہوئے چیئرمین پیپلززپارٹی بلاول بھٹو نے کہا کہ امید ہے ہمیں کیس میں انصاف ضرورملے گا۔ ذوالفقارعلی بھٹوصدارتی ریفرنس کے فیصلے سے تاریخ کو درست کیا جا سکتا ہے۔ یہ ایک موقع ہے قانون، تاریخ اوراپنے مستقبل کو درست کریں۔

بلاول بھٹو نے کہا کہ چیف جسٹس اور دیگرججزقانون کے مطابق فیصلہ سنائیں گے، الیکشن سے پہلے اہم کیسز ہیں، سب کو سننا ہے۔ امید ہے الیکشن کے بعد اس کیس کا فیصلہ آ جائے گا۔ بھٹو کیس کے فیصلے کی مثال آج تک نہیں دی گئی۔ کیس میں جو طریقہ کار اپنایا گیا وہ باربار ہو رہا ہے۔

چیئرمین پیپلزپارٹی نے کہا کہ سینیٹ کی قرارداد اپنی جگہ، الیکشن آٹھ فروری کو ہی ہوگا۔ آپ سب تیاری کریں۔ الیکشن التوا کی قرارداد اقوام متحدہ سے بھی پاس ہو جائےتو بھی انتخابات 8 فروری کو ہوں گے۔ چند سینیٹرزکی قرارداد اہم ہے یا چیف جسٹس کا فیصلہ؟ چیف جسٹس نے کہا کہ 8 فروری انتخابات کی تاریخ پتھر پرلکیر ہے۔

انھوں نے مذید کہا کہ اس بار کراچی کے عوام پیپلز پارٹی کو موقع دیں گے، امید ہے الیکشن میں ہم اپنی حکومت بنا سکیں گے۔