عام انتخابات 2024 کے لیے الیکشن کمیشن نے الیکشن مینیجمنٹ سسٹم کےذریعےنتائج کیلئےتجرباتی مشق کرنےکا فیصلہ کیا ہے۔

الیکشن کمیشن نے چاروں صوبائی الیکشن کمشنرز کو مراسلہ ارسال کر دیا جس میں ہدایت کی گئی ہے کہ ریٹرننگ افسران 26 جنوری کو رزلٹ کی تیاری کے لیے ای ایم ایس پر تجرباتی مشق کریں۔

مراسلے میں کہا گیا ہے کہ ای ایم ایس کی پیشگی مشق 26 جنوری کو کی جائے گی، رزلٹ کی تیاری کے لیے مشق ریٹرننگ افسران کے دفاتر میں کی جائے گی۔

ای ایم ایس کی مشق سے متعلق ایس او پیز جاری کر دیے گئے جس کے مطابق ریٹرننگ افسر 25 جنوری تک فارم 28 اور 33 میں اندراج مکمل کریں گے۔

پریذائیڈنگ افسر25 جنوری تک پولنگ سٹیشن کا میپ بھجوائیں گے۔

مراسلے میں کہا گیا کہ تمام پریذائیڈنگ افسران کو آر اوز 25 جنوری تک ڈمی اندراج شدہ فارم 45 مہیا کریں گے، پریذائیڈانگ افسران قومی و صوبائی اسمبلی کے فارم 45 پر نتائج 26 جنوری کو شام 5 بجے بھیجیں گے۔

ایس اوپیز میں کہا گیا کہ پریذائیڈنگ افسران فارم 45 کی موبائل فوٹو لے سکتے ہیں۔

مراسلے میں یہ بھی کہا گیا کہ 26 جنوری شام 5 بجے سے ای ایم ایس آپریٹر ڈیٹا کا اندراج شروع کر دے گا، فارم 45 اندراج کے بعد ریٹرننگ افسر فارم 47 تیار کر کے الیکشن کمیشن کو بھیجے گا۔

واضح رہے کہ الیکشن کمیشن انتخابی عمل کے دوران چوتھی مرتبہ ای ایم ایس کی تجرباتی مشق کررہا ہے۔