مسلم لیگ ن اور ایم کیو ایم کے درمیان انتخابات کے حوالے سے اہم ملاقات آج کراچی میں ہوئی۔

تفصیلات کے مطابق انتخابات میں سیٹ ایڈجسٹمنٹ کے حوالے سے آج مسلم لیگ ن اور ایم کیو ایم کے رہنماؤں کی اہم ملاقات ہوئی۔

ایم کیو ایم کا وفد مسلم لیگ ن کے مزکزی سیکرٹریٹ پہنچا ، جہاں دونوں جماعتوں کے وفد کے مابین کراچی میں سیٹ ایڈجسٹمنٹ کے حوالے سے بات چیت ہوئی۔

دونوں جماعتوں میں سیٹ ایڈجسٹمنٹ کا معاملہ فائنل ہونے اور دونوں جماعتوں میں قومی اسمبلی کے حلقے  این اے 242 کی نشست پر حتمی فیصلہ ہونے کے امکانات ہیں۔

مسلم لیگ ن اور ایم کیو ایم کے درمیان قومی سمیت صوبائی اسمبلی کی نشستوں پر بھی سیٹ ایڈجسمنٹ متوقع ہے۔

دونوں جماعتوں کے عہدیداران ملاقات کے بعد مشترکہ پریس کانفرنس بھی کی۔ اور آئندہ کے لائحہ عمل سے متعلق اہم اعلانات بھی کئے گئے۔

امین الحق کا کہنا تھا کہ دونوں جماعتوں کے درمیان آج کی ملاقات بہت اہم رہی اور ایم کیو ایم اور مسلم لیگ ن میں ایک بات پر اتفاق ہے کہ کسی بھی طرح سندھ کے حالات صحیح ہوں۔

انہوں نے کہا کہ ہماری خواہش ہے کہ گزشتہ 15 سالوں سے پیپلز پارٹی کا سندھ میں راج کا خاتمہ ہو۔

امین الحق نے کہا کہ جے یو آئی ہو یا ایم کیوایم ہم ساری جماعتیں رابطے میں ہیں، سیٹ ایڈجسمنٹ کا معاملہ بہت حد تک طے پاگئے ہیں۔

ایم کیو ایم نوابشاہ اور میر پور خاص کی صوبائی اسمبلیوں کی نشستوں پر انتخاب لڑے گی۔

مسلم لیگ ن کے رانا مشہود نے کہا کہ ج کی ملاقات میں تمام فیصلے فائنل کردیئے گئے ہیں اور آج کی ملاقات کے بعد دونوں جماعتوں کی سفارشات لیڈر شپ تک جائے گی۔

آج فائنل ہونے والی تمام باتوں سے دونوں جماعتیں اپنی لیڈر شپ کو آگاہ کریں گی، مسلم لیگ ن ہمیشہ سے سبکو ساتھ لے کر چلتی رہی ہے۔

رانا مشہود نے کہا کہ ہم چاہتے ہیں کہ دونوں جماعتیں صرف الیکشن تک ہی ساتھ نہ ہوں بلکہ مستقبل میں بھی ساتھ چلیں، آج فائنل کی باتوں کا اعلان دونوں جماعتوں کی لیڈر شپ کرے گی۔

ایک سوال کے جواب میں امین الحق نے کہا کہ این اے 242 کے حوالے سے ہم ساتھ میں بیٹھے ہیں، اور این اے 242 کا فیصلہ باوقار فیصلہ ہوا ہے۔

امین الحق نے کہا کہ این اے 242 کا حتمی فیصلہ خالد مقبول صدیقی اور شہباز شریف پر چھوڑ دیا ہے۔

امین الحق کا کہنا تھا کہ آج کی ملاقات کے بعد ڈیڈ لاک نہ ہونے کے برابر ہے، اور کس پارٹی کا سربراہ کس سے ملنے جائے گا اسکا فیصلہ وقت کے ساتھ ہوگا۔

انہوں نے کہا کہ نواز شریف اور شہباز شریف بڑے سیاست دان ہیں اگر ایم کیو ایم کی قیادت ان سے ملنے چلی بھی جائے تو کوئی بات نہیں۔