پاکستان نے فضائی دفاع کے میدان میں اہم سنگ میل عبور کر لیا ہے اور مشقوں کے دوران ہائی میڈ ویپن سسٹم کا پہلا فائر کیا گیا۔

تفصیلات کے مطابق پاک آرمی ائیر ڈیفنس کی مشقوں کے دوران ہائی میڈ ویپن سسٹم کا پہلا فائر کر کے فضائی دفاع کے میدان میں بڑی کامیابی حاصل کر لی ہے۔ پاکستان کے ہائی میڈ سسٹم نے زیادہ سے زیادہ فاصلے پر اہداف کو ٹھیک ٹھیک نشانہ بنا کر ملک کے مضبوط فضائی دفاع پر مہر ثبت کر دی ہے۔

آئی ایس پی آر کے مطابق آرمی چیف جنرل سید عاصم منیر نے سونمیانی میں جایر جاری مشق البیزا سوئم میں ہائی میڈ ویپن سسٹم کے پہلے فائر کا مشاہدہ کیا۔

مشق کے دوران مختلف ایئر ڈیفنس ویپن سسٹمز کی فائرنگ کا کامیاب مظاہرہ کیا گیا۔

آرمی چیف جنرل سید عاصم منیر نے آرمی ایئر ڈیفنس سسٹم کے مربوط فائر اور جنگی مشقیں دیکھیں، جن میں ہائی ٹو میڈیم ایئر ڈیفنس ویپن سسٹم، لو ٹو میڈیم ایئر ڈیفنس سسٹم، شارٹ رینج ایئر ڈیفنس سسٹم اور ایکسٹینڈڈ شارٹ رینج ایئر ڈیفنس سسٹم شامل ہیں۔

یہ کامیاب مشقیں ملکی فضائی سرحدوں میں ائیر ڈیفنس کو تقویت دینے کے لئے تاریخی کامیابی اور سنگ میل ہیں، جس کے دوران ہائی ٹو میڈیم ایئر ڈیفنس ویپن سسٹم کا پہلی بار کامیاب تجربہ کیا گیا۔

ہائی میڈ ویپن سسٹم نے کامیابی سے دیگر ہتھیاروں کے نظام کے ساتھ اپنے اہداف کو کامیابی سے نشانہ بنایا، جن کا مشق کے دوران سسٹمز کے ساتھ تجربہ کیا گیا۔

آرمی چیف جنرل سید عاصم منیر نے آرمی ایئر ڈیفنس کور کی آپریشنل تیاری سمیت اہداف کی قابل ذکر کامیابیوں کو سراہا۔

افسروں اور فوجیوں کے ساتھ بات چیت کرتے ہوئے آرمی چیف جنرل سید عاصم منیر نے کہا کہ مسلح افواج وطن کے خلاف پیدا ہونے والے ہر طرح کے  خطرات کا سامنا کرنے کیلئے تیار ہے اور مسلح افواج اپنی ضروریات کے مطابق اپنے نظام کو جدید بنا رہی ہیں۔

کور کمانڈر کراچی، کمانڈر آرمی ایئر ڈیفنس، انسپکٹر جنرل ٹریننگ اینڈ ایویلیوایشن اور انسپکٹر جنرل آرمز نے بھی مشق کا مشاہدہ کیا۔

قبل ازیں آرمی چیف نے آرمی ایئر ڈیفنس سینٹر کا دورہ کیا، انہوں نے یادگار شہدا پر پھول رکھے اور مسلح افواج کے شہداء کو بھرپور خراج عقیدت پیش کیا۔

آرمی چیف جنرل سید عاصم منیر نے لیفٹیننٹ جنرل محمد ظفر اقبال کو آرمی ائیر ڈیفنس کور کا کرنل کمانڈنٹ کے بیجز بھی لگائے۔