یمن کے ساحل کے قریب بحیرہ احمر میں مالٹا کے جھنڈے والے یونانی بحری جہاز کو میزائل سے نشانہ بنایا گیا ہے۔

برطانوی خبر رساں ادارے کی خبر کے مطابق بحیرہ احمر میں گزشتہ 24 گھنٹوں کے دوران یہ تیسرا واقعہ ہے جس میں ایک یونانی بحری جہاز زوگرافیا پر میزائل سے حملہ کیا گیا ہے۔

منگل کو پیش آنے والا یہ واقعہ ایک ایسے وقت میں پیش آیا ہے جب امریکی فوج نے اعلان کیا ہے کہ اس نے گذشتہ ہفتے ایک آپریشن کے دوران حوثیوں کے لیے ایرانی فراہم کردہ اسلحہ قبضے میں لے لیا ہے۔

دریں اثنا، امریکہ نے یمن کے حوثیوں کے زیر کنٹرول علاقوں میں مزید اہداف کو نشانہ بنایا ہے۔

ایک عہدیدار نے برطانوی خبر رساں ادارے کے امریکی پارٹنر کو بتایا کہ امریکہ نے رات گئے حوثیوں کے ٹھکانوں پر مزید حملے کیے۔

امریکہ اور برطانیہ نے 11 جنوری کو بحیرہ احمر میں جہاز رانی پر ایرانی حمایت یافتہ گروپ کے حملوں کے بعد حوثیباغیوں کے درجنوں ٹھکانوں پر فضائی حملوں کا سلسلہ شروع کیا تھا۔

ابھی تک یہ معلوم نہیں ہوسکا ہے کہ تازہ ترین امریکی آپریشن میں کس چیز پر حملہ کیا گیا۔

حوثی باغیوں نے جوابی کارروائی کا عزم ظاہر کیا ہے اور اتوار کے روز امریکہ نے کہا تھا کہ اس نے یمن کے حوثی علاقے سے اس کے ایک جنگی جہاز پر داغے گئے میزائل کو مار گرایا ہے۔

حماس کے ساتھ اسرائیل کی جنگ کے خلاف احتجاج کے طور پر نومبر سے تحریک کے جنگجوؤں نے متعدد بحری جہازوں کو نشانہ بنایا ہے۔

حوثی باغیوں کا کہنا ہے کہ وہ ان بحری جہازوں کو نشانہ بنا رہے ہیں جو اسرائیل کی ملکیت ہیں، جھنڈے یا چلائے جا رہے ہیں یا اسرائیلی بندرگاہوں کی طرف جا رہے ہیں۔

بحیرہ احمر نہر سوئز کے ذریعے بحر ہند کو بحیرہ روم سے ملاتا ہے لیکن متعدد شپنگ لائنوں نے اعلان کیا ہے کہ وہ اب کیپ آف گڈ ہوپ کے گرد گھوم کر یورپ پہنچ رہے ہیں۔