شاہ محمود قریشی کا کہنا ہے کہ جاوید ہاشمی کا مسلم لیگ کے پلیٹ فارم سے بانی پی ٹی آئی کے حق میں بیان بہت بڑی بات ہے۔

پاکستان تحریک انصاف کے وائس چیئرمین شاہ محمود قریشی نے اڈیالہ جیل میں صحافیوں سے گفتگو کرتے ہوئے کہا کہ جاوید ہاشمی کا شکریہ ادا کرنا چاہتا ہوں، انہوں نے حق اور سچ کا جھنڈا بلند کیا ہے۔

انہوں نے کہا کہ بلاول سے پوچھنا چاہتا ہوں کہ آج آپ کو نواز شریف کی انتقامی سیاست نظر آرہی ہے، بلاول نے شہباز شریف کی حکومت کے اندر وزیر خارجہ کا حلف کیوں اٹھایا؟ بلاول کہتا ہے کہ ہم بھٹو کے وارث ہیں تو انہوں نے پی ڈی ایم بنا کر ضیاء کے وارثوں کیساتھ الحاق کیوں کیا۔

شاہ محمود قریشی کا کہنا تھا کہ آئی پی پی نے چند سیٹوں کیلئے اپنی پارٹی کی قربانی دے دی ہے، ملتان میں جہانگیر ترین (ن) لیگ کی مدد مانگ رہا ہے، لودھراں میں (ن) لیگ کی مخالفت کررہا ہے، آئی پی پی نے 51 سیٹوں پر کاغذات نامزدگی جمع کرائے، 7 پر ایڈجسٹمنٹ کی۔

انہوں نے مزید کہا کہ سائفر صرف اور صرف سیکرٹری خارجہ کے دیکھنے کے لیے تھا، قومی سلامتی کمیٹی نے سیاسی مداخلت کو مانا، سائفر آنے کے بعد خان صاحب نے کہا جتنے بھی پارلیمنٹری لیڈرز ہیں سب کو بریف کیا جائے جس پر سیکرٹری خارجہ نے تمام پارلیمنٹری لیڈرز کو سائفر پر بریفنگ بھی دی

شاہ محمود قریشی کا کہنا تھا کہ جاوید ہاشمی کا مسلم لیگ کے پلیٹ فارم سے بانی پی ٹی آئی کے حق میں بیان بہت بڑی بات ہے، جاوید ہاشمی نے کہا ہے کہ وہ سابق وزیراعظیم کی رہائی کیلئے مسلم لیگ کے پلیٹ فارم سے مہم کی قیادت کریں گے جس پر ہم جاوید ہاشمی کے شکر گزار ہیں۔