خیبرپختونخوا کے ضلع باجوڑ میں فائرنگ سے آزاد امیدوار ریحان زیب جاں بحق ہو گئے۔

تفصیلات کے مطابق معروف پاکستانی سیاسی شخصیت ریحان زیب خان فائرنگ سے جاں بحق ہو گئے ہیں۔

باجوڑ پولیس کے مطابق قومی اسمبلی کے حلقے این اے 8 اور صوبائی اسمبلی کے حلقے پی کے 22 سے آزاد امیدوار ریحان زیب خان الیکشن مہم کے سلسلے میں صدیق آباد پھاٹک پر موجود تھے۔

پولیس کا کہنا ہے کہ نامعلوم افراد نے فائرنگ کر کے ریحان زیب خان کو قتل کر دیا اور باآسانی فرار ہو گئے۔

مقتول ریحان زیب کی لاش پوسٹ مارٹم کے لیے اسپتال منتقل کر دی گئی ہے، ملزمان کی گرفتاری کے لیے پولیس واقعے کی تفتیش کر رہی ہے۔

این اے 8، پی کے 22 اور پی کے 91 میں انتخابات ملتوی

باجوڑ میں آزاد امیدوار کے قتل کے بعد این اے 8 اور پی کے 22 میں عام انتخابات ملتوی کر دیے گئے ہیں۔

ریحان زیب پر قاتلانہ حملے کے بعد حلقہ پی کے 22 میں الیکشن ملتوی کیا گیا، ریٹرننگ آفیسر نے نوٹیفکیشن جاری کر دیا ہے۔

دوسری جانب کوہاٹ میں حلقہ پی کے 91 میں صوبائی الیکشن 45 دنوں کے لیے مؤخر کیا گیا ہے، پی کے 91 سے اے این پی امیدوار عصمت اللہ دل کا دورہ پڑنے سے انتقال کر گئے تھے۔

الیکشن کمیشن نے چاروں صوبائی الیکشن کمشنرز کو مراسلے ارسال کر دیئے، پریزائیڈنگ افسر کے علاوہ تمام عملہ پولنگ کے دوران موبائل فون بند رکھے گا۔