پاکستان پیپلز پارٹی کے مرکزی الیکشن مانیٹرنگ سیل کے انچارج تاج حیدر نے کہا ہے کہ پیپلز پارٹی کا دس نکاتی پروگرام قابل عمل ہے۔

تفصیلات کے مطابق تاج حیدر نے اپنے ایک بیان میں کہا کہ بات بیماری ناخواندگی بیروزگاری اور بھوک کے خاتمے پر زیادہ سے زیادہ ریاستی وسائل کو سمجھداری سے خرچ کرنے کی ہے، اس کے علاوہ اچھی حکمرانی قائم نہیں ہو سکتی، سبسڈی اور اضافی غیرآئینی وفاقی وزارتوں میں سالانہ خرچ ہونے والے تقریباً دو ٹریلین روپوﺅں کی رقم کو دس نکاتی پروگرام کے ذریعے فلاح و بہبود کی طرف موڑ دیا جا رہا ہے، اشرافیہ کی جیبوں میں جانے کی بجائے یہ رقم عوام کی فلاح و بہبود پر خرچ ہو گی۔

سینیٹر تاج حیدر نے کہا کہ پانچ سالوں میں حقیقی اجرت کو دوگنا کرنے سے غریبوں کی قوت خرید میں اضافہ ہوتا ہے اور پیسہ گردش میں آتا ہے، بڑھتی ہوئی طلب اور قومی پیداوار جس کے بغیر کوئی اقتصادی ترقی نہیں ہو سکتی، پبلک پرائیویٹ پارٹنرشپ کے تحت پبلک سیکٹر میں سرمایہ کاری میں اضافہ جیسا کہ عوام حکومت نے قدرتی اور انسانی مسائل کو متحرک کرنے کے لئے تھر کول میں کیا، صحت اور تعلیم کے شعبوں میں بھی عظیم کامیابیاں حاصل کی ہیں جو پورے ملک میں منتقل ہو سکتی ہیں۔

ان کا کہنا تھا کہ جے پی این سی، ایس یو آئی ٹی اور این آئی سی وی ڈی میں مریضوں کا مفت علاج ہو رہا ہے، گمپٹ انسٹی ٹیوٹ آف لیور اور دیگر اعضاء کی پیوندکاری اور سندھ کے بہت سے دوسرے پبلک سیکٹر ہسپتال نہ صرف پورے پاکستان بلکہ بیرون ممالک سے تعلق رکھنے والے مریضوں کو بھی اپنی طرف متوجہ کرتے ہیں، صرف این آئی سی وی ڈی نے پچھلے پانچ سالوں میں 3 لاکھ 68 ہزار سے زیادہ مریضوں کا علاج کیا جن کا تعلق دوسرے صوبوں سے تھا۔

سینیٹر تاج حیدر نے سوال کیا کہ مریض اپنی بیمار حالت میں سفر میں کرنے کی بجائے اپنے اضلاع میں سندھ کی طرح طبی علاج کے مستحق نہیں ہیں؟ سیلاب سندھ میں اسکولوں کی نصف عمارتوں کو بہا لے گیا اور ہم ان کی تعمیر نو کر رہے ہیں، اس کے باوجود اعلیٰ تعلیم کے لئے مختص رقم پورے پاکستان میں پہلی پبلک سیکٹر یونیورسٹیوں کی ضروریات کو پورا کرنے کے لئے ایچ ای سی کی کل مختص رقم کے بہت قریب پہنچ گئی ہے۔

تاج حیدر نے کہا کہ پری پرائمری سے لے کر اعلیٰ ترین سطح پر مفت تعلیم ایک ایسی ترجیح ہونی چاہیے کہ جس سے پاکستان آگے بڑھ سکے، ہمارے پاس وسائل ہیں، ہماری ترجیحات کو اشرافیہ نے غلط جگہ استعمال کیا ہے، بی آئی ایس پی کسان کارڈ مزدور کارڈ یوتھ کارڈ کی توسیع بھی بہت ضروری ہے، سندھ میں عوامی حکومت کی جانب سے جمع کردہ خدمات پر سیلز ٹیکس 14 سالوں میں چھ ارب سے بڑھ کر 230 ارب روپے تک پہنچ گیا ہے، اس عرصے کے دوران ٹیکس کی شرح 17 فیصد سے کم ہو کر دس فیصد رہ گئی ہے۔