صومالیہ کے ساحل پر کارروائی کے دوران امریکی بحریہ کے دو سیلرز کے سمندر میں لاپتہ ہونے کی اطلاع ملی ہے۔

عرب میڈیا کے مطابق امریکی سینٹرل کمانڈ نے ایک مختصر بیان میں کہا ہے کہ امریکی بحریہ کے دو ملاح جمعرات کی شام سے لاپتہ ہیں، دونوں کی تلاش کے لیے سرچ اینڈ ریسکیو آپریشن جاری ہے۔

سینٹرل کمانڈ کے ترجمان کا کہنا تھا کہ آپریشنل سیکیورٹی مقاصد کے لئے ہم اضافی معلومات اس وقت تک جاری نہیں کریں گے جب تک اہلکاروں کی بازیابی کا آپریشن مکمل نہیں ہوجاتا۔

ملاحوں کو امریکہ کے پانچویں بیڑے کے علاقے میں فارورڈ تعینات کیا گیا تھا جو مختلف قسم کے مشنوں کی حمایت کرتا تھا۔

فوج کی ویب سائٹ کے مطابق پانچویں بیڑے کی کارروائیوں کا علاقہ تقریبا 2.5 ملین مربع میل پانی پر محیط ہے اور اس میں خلیج، بحیرہ احمر، خلیج عمان اور بحر ہند کے کچھ حصے شامل ہیں۔

امریکی افواج طویل عرصے سے صومالیہ میں حکومت کے تعاون سے کام کر رہی ہیں اور زیادہ تر شدت پسند الشباب باغیوں کے خلاف لڑنے والی سرکاری افواج کی مدد کے لیے باقاعدگی سے فضائی حملے کر رہی ہیں۔

امریکی افریقی کمان کے مطابق الشباب دنیا میں القاعدہ کا سب سے بڑا اور متحرک نیٹ ورک ہے اور اس نے امریکی افواج پر حملہ کرنے اور امریکی سلامتی کے مفادات کو خطرے میں ڈالنے کی اپنی خواہش اور صلاحیت دونوں کو ثابت کیا ہے۔