قطر کی عدالت نے اسرائیل کے لیے جاسوسی کرنے والے بھارتی بحریہ کے 8 سابق افسران کو قید کی سزائیں سنا دی ہیں۔

برطانوی خبر رساں ادارے کی خبر کے مطابق بھارتی بحریہ کے ان سابق افسران کو پہلے سزائے موت سنائی گئی تھی لیکن پھر بعد میں ان کی سزائے موت قید میں بدل دی گئی ہیں۔

بھارت نے کہا ہے کہ بھارتی بحریہ کے آٹھ سابق افسران جنہیں پہلے قطر میں سزائے موت سنائی گئی تھی، اب “مختلف” مدت کی قید کی سزاؤں کا سامنا کر رہے ہیں۔

ان افراد کے پاس جیل کی سزا کے خلاف اپیل کرنے کے لیے 60 دن کا وقت ہے انہیں گزشتہ ماہ قطر کی ایک عدالت نے ان کی سزائے موت کو کم کر دیا تھا۔

ابھی تک نہ تو قطر اور نہ ہی بھارت نے ان افراد کے خلاف مخصوص الزامات کا انکشاف کیا ہے۔

تاہم عالمی خبر رساں اداروں نے نامعلوم ذرائع کے حوالے سے خبر دی ہے کہ ان افراد پر اسرائیل کے لیے جاسوسی کرنے کا الزام ہے۔

بھارت، قطر اور اسرائیل نے اس پر کوئی تبصرہ نہیں کیا ہے۔ اس معاملے میں عدالتی احکامات کو بھی عام نہیں کیا گیا ہے۔

بھارت اس معاملے میں ہونے والی بڑی پیش رفت کے بارے میں بیانات جاری کرتا رہا ہے جسے حکومت کے لیے سفارتی امتحان کے طور پر دیکھا جا رہا ہے۔

جمعرات کو ایک پریس بریفنگ میں بھارتی وزارت خارجہ کے ترجمان رندھیر جیسوال نے کہا کہ ان افراد کی قانونی ٹیم کو اب ان کی سزائے موت کو کم کرنے کے عدالتی حکم تک رسائی حاصل ہے۔

ترجمان رندھیر جیسوال نے کہا کہ اب یہ قانونی ٹیم پر منحصر ہے کہ وہ اگلے لائحہ عمل کا فیصلہ کرے۔

اکتوبر 2023 میں بھارت نے کہا تھا کہ قطر کی عدالت کی جانب سے ان افراد کو سزائے موت سنائے جانے کے بعد وہ ‘شدید صدمے’ میں ہے۔

وزارت خارجہ نے کہا کہ وہ تمام قانونی آپشنز پر غور کرے گی اور بعد میں سزا کے خلاف اپیل دائر کی۔

ان افراد کی گرفتاری نے 2022 میں بھارت میں پہلے صفحے پر شہ سرخیوں میں جگہ بنائی تھی۔

بھارتی حکومت نے ایک بیان میں ان آٹھ افراد کو الضحرہ نامی ایک نجی کمپنی کا ملازم قرار دیا ہے تاہم ان کے بارے میں بڑے پیمانے پر بتایا گیا ہے کہ وہ بھارتی بحریہ کے سابق اہلکار ہیں۔

پارلیمنٹ میں وزیر خارجہ ایس جئے شنکر نے انہیں ملک کا سابق فوجی قرار دیا۔ کچھ افراد کے اہل خانہ نے بھی مقامی میڈیا کو ان کی شناخت اور بحریہ میں پس منظر کی تصدیق کی ہے۔