عام انتخابات2024 کی سیکیورٹی کے معاملے پرپاک فوج تعینات ہوگی، وزارتِ داخلہ نے سمری کابینہ کو بھجوا دی۔

تفصیلات کے مطابق عام انتخابات برائے 2024 کی سیکیورٹی کے لیے الیکشن کمیشن آف پاکستان کی جانب سے وفاقی حکومت اور وزارتِ داخلہ سے پاک فوج کے اہلکارتعینات کرنے کی درخواست کی گئی۔

ذرائع کا کہنا ہے کہ وزارت داخلہ کی جانب سے پاک فوج کی فراہمی کےلیے بھجوائی جانے والی سمری وفاقی کابینہ کو موصول ہوگئی ہے۔ جس پروفاقی کابینہ جائزہ لے گی۔

نگراں وفاقی کابینہ کی جانب سے منظوری کے بعد ملک بھر میں عام انتخابات کی سیکیورٹی کے لیے پاک فوج، رینجرز اور ایف سی کے اہلکارتعینات ہونگے۔

ذرائع کے مطابق الیکشن کمیشن نے وزارتِ داخلہ سے 2 لاکھ 77 ہزار فوجی اہلکار مانگے ہیں۔

واضح رہے کہ الیکشن حکام اور وزارتِ دفاع کے درمیان اہم اجلاس منعقد ہوا تھا جس میں الیکشن کمیشن کی جانب سے دو لاکھ 77 ہزار کے قریب سول آرمڈ فورسزاور پاک فوج کے اہلکار مانگے گئے تھے۔ لیکن ذرائع کا کہنا ہے کہ وزارتِ دفاع کی جانب سے تقریبا سوا لاکھ فوجی اہلکار دینے کی یقین دہانی کرائی گئی تھی۔

دوسری جانب  پنجاب میں امن و امان کی صورتحال برقراررکھنے کے لیے محکمہ داخلہ پنجاب میں صوبہ بھر میں دفعہ 144 نافذ کرنے کا نوٹیفکیشن جاری کردیا گیا ہے۔

نوٹیفکیشن کے مطابق الیکشن کے دوران لائسنس و غیر لائسنس اسلحہ لیکر گھومنے پر پابندی ہوگی، الیکشن کمیشن کے ضابطہ اخلاق کی خلاف ورزی پر مقدمات درج ہوں گے۔

نوٹیفکیشن میں کہا گیا ہے کہ الیکشن مہم اور جلسے جلوسوں سمیت جیت کی خوشی میں ہوائی فائرنگ پر بھی پابندی ہوگی، دفعہ 144 کا نفاذ 12 فروری تک لاگو ہوگا۔