سعودی حکام نے ایک ہفتے کے دوران 19 ہزار 321 افراد کو رہائش اور مزدوری کی خلاف ورزی پر گرفتار کر لیا ہے۔

تفصیلات کے مطابق سعودی عرب کے حکام نے ایک ہفتے کے دوران رہائشی، کام اور سرحدی سیکیورٹی قوانین کی خلاف ورزی پر 19 ہزار 321 افراد کو گرفتار کیا ہے۔

ایک سرکاری رپورٹ کے مطابق، رہائشی قوانین کی خلاف ورزی پر مجموعی طور پر 11،427 افراد کو گرفتار کیا گیا، جبکہ 4،697 کو غیر قانونی طور پر سرحد پار کرنے کی کوششوں پر گرفتار کیا گیا، اور مزید 3،197 افراد کو مزدوری سے متعلق امور پر گرفتار کیا گیا۔

رپورٹ میں بتایا گیا ہے کہ غیر قانونی طور پر سعودی عرب میں داخل ہونے کی کوشش کے الزام میں گرفتار کیے گئے 1070 افراد میں سے 31 فیصد یمنی، 67 فیصد ایتھوپیا اور 2 فیصد دیگر قومیتوں کے تھے۔

مزید 193 افراد ہمسایہ ممالک میں داخل ہونے کی کوشش کرتے ہوئے پکڑے گئے، اور 11 کو خلاف ورزی کرنے والوں کی نقل و حمل اور پناہ دینے میں ملوث ہونے کے الزام میں گرفتار کیا گیا۔

سعودی وزارت داخلہ کا کہنا ہے کہ اگر کوئی شخص مملکت میں غیر قانونی داخلے میں سہولت فراہم کرتا پایا گیا تو اسے زیادہ سے زیادہ 15 سال قید، 10 لاکھ ریال تک جرمانے کے ساتھ ساتھ گاڑیاں اور املاک ضبط کرنے کا سامنا کرنا پڑ سکتا ہے۔

سعودی حکام کا کہنا ہے کہ مکہ مکرمہ اور ریاض کے علاقوں میں ٹول فری نمبر 911 اور مملکت کے دیگر علاقوں میں 999 یا 996 پر مشتبہ خلاف ورزیوں کی اطلاع دی جاسکتی ہے۔