قومی ٹیم کے مایہ ناز بلے باز فخرزمان نیوزی لینڈ کے خلاف سیریز میں کسی بھی نمبر پر بیٹنگ کرنے کے لیے پرجوش ہیں۔

بدھ کو میڈیا سے گفتگو کرتے ہوئے پاکستان کے جارحانہ مزاج بلے باز فخرزمان نے اپنی صلاحیتوں پر ٹیم انتظامیہ کے اعتماد کو اجاگر کیا۔

انہوں نے کہا ’’میں اسے قربانی کے طور پر نہیں دیکھتا اور اگر ٹیم مینجمنٹ مجھے اوپننگ پوزیشن پر فٹ نہیں سمجھتی تو اس سے پتا چلتا ہے کہ انہیں یقین ہے کہ کہ میں کسی بھی نمبر پر بیٹنگ کرنے کی صلاحیت رکھتا ہوں اور میچ جتنوانے میں اپنا حصہ ڈال سکتا ہوں‘‘۔

ان کا کہنا تھا ’’بابر اعظم، محمد رضوان اور صائم ایوب جیسے کھلاڑیوں کی شاندار کارکردگی کو دیکھتے ہوئے میں خود کو خوش قسمت سمجھتا ہوں کیونکہ میں پلیئنگ الیون اپنی جگہ بنانے میں کامیاب رہا‘‘۔

فخرزمان کہتے ہیں ’’اگر بابر اور رضوان میں سے کوئی ون ڈاؤن آتا ہے تو میں چوتھے نمبر پر بیٹنگ کے لیے آسکتا ہوں لیکن مجھے چھٹے اور ساتویں نمبر پر بھی کھیلنے میں خوشی ہوگی‘‘۔

واضح رہے کہ نیوزی لینڈ کے خلاف سیریز میں محمد رضوان کے ساتھ صائم ایوب کے اوپننگ کرنے کا امکان ہے جب کہ بابر اعظم ون ڈاؤن اور فخرزمان کی چوتھی پوزیشن متوقع ہے۔