سابق بھارتی ہائی کمشنرنے پاک فضائیہ کے آپریشن سوئفٹ ریٹارٹ کو بھی بھونڈے طریقے سے مودی کی کامیابی قرار دے دیا۔

حیران کن طورپراجے بساریا کئی سال خاموش رہنے کے بعد اچانک نمودار ہو کر مودی پروپیگنڈا کا آلہ کار بن گیا۔

اجے بساریہ کا کہنا ہے کہ ابھینندن کی پاکستان میں گرفتاری کے بعد مودی سرکار نے پاکستان پر 9 میزائل داغنے کا فیصلہ کر لیا تھا،  پاکستانی وزیراعظم نے مودی کو بارہا کالیں کیں لیکن مودی نے جواب نہ دیا۔

 تجزیہ نگارکا کہنا ہے کہ بھارتی پروپیگنڈے کا مقصد آنے والے انتخابات ہیں، جب کہ دفاعی ماہرین کا کہنا ہے کہ جس فوج نے دن دہاڑے بھارت میں گھس کراس کے دو جہازمارگرائے ہوں اس کا ڈر کے مارے ابھینندن کی رہائی کا دعویٰ مضحکہ خیز ہے۔

دفاعی ماہرین کے مطابق پاکستان نے انتہائی ذمہ داری کا مظاہرہ کرتے ہوئے جنگ کے پھیلاؤ کو روکنے کے لیے بھارتی قیدی کو رہا کیا تھا۔

مودی سرکار ماضی میں بھی جھوٹے دعوے کر چکی ہے جن کو عالمی میڈیا اور ماہرین بے نقاب کر چکے ہیں۔

بھارت نے اپنے حملے میں 3 سو دہشتگردوں کے ہلاک ہونے کا دعویٰ کیا لیکن الجزیرہ کی رپورٹ نے بھارتی بم کھلی جگہ پر گرنے کا انکشاف کیا۔

آپریشن سوئفٹ ریٹارٹ کے بعد بھارت نے پاکستانی ایف سولہ مار گرانے کا جھوٹا دعویٰ کیا تھا۔ جھوٹے بھارتی دعوےٰ کو پینٹاگون، کرسٹین فیئراورکئی بھارتی دفاعی تجزیہ نگاروں نے بھی جھٹلایا۔

ماہرین کا کہنا ہے کہ بھارت کے رات کی تاریکی میں حملے کا پاکستان نے دن کی روشنی میں جواب دیا، بھارت نے کھلے علاقے میں بم گرائے لیکن دعویٰ دہشتگردوں کے کیمپ پراسٹرائیک کا کیا۔ بھارتی حملے کے برعکس پاکستان کا جواب کرارا، نپا تلا اور دعوےٰ کے عین مطابق تھا۔

مقبوضہ کشمیرکے سابق گورنرستیا پال ملک، کانگریس رہنما راہول گاندھی اور کئی دیگر رہنما اور صحافی پلوامہ حملے کے جعلی ہونے کا انکشاف کر چکے ہیں۔ پرشانت بھوشن، ممتا بنرجی اور رویش کمار بھی پلوامہ ڈرامے کا الزام مودی سرکار پر لگا چکے ہیں۔

ماہرین کہنا تھا کہ حالیہ ڈرامے اور رام مندر کی بڑے پیمانے پر افتتاحی تقریب کا مقصد انتخابات سے قبل مذہبی اور پاکستان مخالف جذبات کو ابھار کر ووٹ حاصل کرنا ہے۔