نگراں وزیر اعلیٰ بلوچستان کی زیر صدارت ایپکس کمیٹی کا 15 اجلاس منعقد کیا گیا۔

تفصیلات کے مطابق نگراں وزیر اعلیٰ علی مردان ڈومکی بلوچستان کی زیر صدارت ایپکس کمیٹی کا 15 اجلاس منعقد کیا گیا، جس میں کور کمانڈر، نگراں وزیر داخلہ اور چیف سیکریٹری نے شرکت کی۔

اپیکس کمیٹی اجلاس میں اعلیٰ صوبائی سول وعسکری حکام نے بھی شرکت کی۔

ایپکس کمیٹی کے اجلاس میں بلوچستان میں پرامن انتخابات کے انعقاد کے لئے اقدامات  کا جائزہ لیا گیا۔

اس موقع پر اجلاس کے شرکاء سے گفتگو کرتے ہوئے نگراں وزیر اعلیٰ نے کہا کہ پرامن الیکشن کے انعقا دکیلئے انتظامی حکمت عملی مرتب کرلی ہے۔

وزیر اعلیٰ نے کہا کہ عام انتخابات میں حساس مقامات پر پاک فوج اور ایف سی کے جوان بھی موجود ہوں گے اور 28 پولنگ اسٹیشنز پرانتخابی سامان کی ترسیل سڑک کے ذریعے ہو گی۔

نگراں وزیر اعلیٰ کا کہنا تھا کہ 8 پولنگ اسٹیشنز پر انتخابی میٹریل کی ترسیل ہیلی کاپٹر سے کی جائے گی، اور حساس پولنگ اسٹیشنز پر سی سی ٹی وی کیمروں کی تنصیب جاری ہے۔

سیکیوریٹی کے حوالے سے نگراں وزیر اعلیٰ نے بتایا کہ پولیس اور لیویز اہلکاروں کی تعیناتی کا ابتدائی میزانیہ جاری کر دیا گیا۔

ایپکس کمیٹی کے اجلاس میں وزیر اعلیٰ نے بتایا کہ کہ الیکشن میں لائن ڈپارٹمنٹس، ریٹائرڈسیکیورٹی اہکاروں کو بھی طلب کرنے کا فیصلہ کیا گیا ہے اور الیکشن انتظامات کے لیے ڈی سیز اور پولیس کو فنڈز کا اجراء کر دیا گیا ہے۔