سرد جنگ کے خاتمے کے بعد نیٹو اتحاد میں شامل افواج نے پہلی مرتبہ سے سے بڑی فوجی مشقوں کا آغاز کر دیا ہے۔

عرب میڈیا کے مطابق نیٹو نے سرد جنگ کے بعد اپنی سب سے بڑی فوجی مشقوں کا آغاز کیا ہے جس میں ایک امریکی جنگی جہاز بحر اوقیانوس کے پار یورپ میں اتحادی علاقوں میں ٹرانزٹ کے لیے امریکہ سے روانہ ہوا ہے۔

مغربی فوجی اتحاد نے کہا ہے کہ یوکرین کے خلاف روس کی جنگ کے تناظر میں اس کے دفاع کو جانچنے کے لیے کئی ماہ تک جاری رہنے والی ‘اسٹینڈڈ ڈیفینڈر 24’ مشق میں تقریبا 90 ہزار فوجی حصہ لیں گے۔

نیٹو کے سپریم الائیڈ کمانڈر یورپ جنرل کرسٹوفر کیولی نے کہا کہ یہ اتحاد شمالی امریکہ سے افواج کی ٹرانس اٹلانٹک نقل و حرکت کے ذریعے یورو-اٹلانٹک کے علاقے کو مضبوط بنانے کی اپنی صلاحیت کا مظاہرہ کرے گا۔

جنرل کرسٹوفر کیولی نے کہا کہ 2024 ء ہمارے اتحاد، طاقت اور ایک دوسرے، ہماری اقدار اور اصولوں پر مبنی بین الاقوامی نظام کی حفاظت کے عزم کا واضح مظاہرہ ہوگا۔

یہ مشق روس جیسے حریف کے حملے کے جواب میں 31 ممالک کے اتحاد کے ردعمل کی نقل کرنے کے لئے ڈیزائن کی گئی ہے۔

یہ چھوٹی انفرادی مشقوں کے ایک سلسلے پر مشتمل ہوگی اور شمالی امریکہ سے لے کر نیٹو کے مشرقی حصے تک، جو روسی سرحد کے قریب ہے، پر محیط ہوگی۔

نیٹو کے مطابق اس مشق میں تقریبا 50 بحری جہاز، 80 طیارے اور 1100 سے زائد لڑاکا گاڑیاں حصہ لیں گی۔

یہ مشقیں سرد جنگ کے دوران 1988 میں ہونے والی ریفورگر مشقوں کے بعد سے سب سے بڑی مشقیں ہیں جب 2022 میں روس کے یوکرین پر حملے کے بعد نیٹو نے اپنے دفاع کو بہتر بنایا ہے۔