کراچی: آئی جی سندھ رفعت مختار راجہ کی پی سی بی چیئرمین ذکاء اشرف سے ملاقات۔

آئی جی سندھ رفعت مختار راجہ نے پی سی بی چیئرمین ذکاء اشرف سے ملاقات کی جس میں پی ایس ایل کے کراچی میں منعقد ہونے والے میچز کے دوران سیکیورٹی اقدامات کے حوالے سے گفتگو کی گئی۔

ملاقات میں 17 فروری سے شروع ہونے والے پی ایس ایل کے 9 ویں سیزن سمیت پی سی بی کے تحت نیشنل اسٹیڈیم میں منعقد ہونے والے دیگر مختلف میچوں کے دوران بھی سیکورٹی اقدامات اور دیگر ضروری امور پر گفتگو کی گئی۔

ترجمان سندھ پولیس کے مطابق آئی جی سندھ نے کہا کہ پی ایس ایل کی سیکیورٹی کے لیے مربوط کنٹی جینسی پلان ترتیب دیا جائے گا جب کہ پی ایس ایل کے دوران سیکیورٹی کے فول پروف انتظامات کویقینی بنایا جائے گا۔

انہوں نے کہا کہ سندھ پولیس نے ہمیشہ ہر اہم ایونٹ میں سیکیورٹی اقدامات کو ہمہ وقت الرٹ اور مستعد رہتے ہوئے پایہ تکمیل تک پہنچایا ہے۔

آئی جی سندھ کا کہنا تھا کہ نیشنل اسٹیڈیم کراچی میں ہونے والے پی ایس ایل کرکٹ میچز کے موقع پر سیکیورٹی کے مجموعی امور کو ہر لحاظ سے فول پروف اور غیر معمولی بنایا جائے گا۔

ترجمان سندھ پولیس نے بتایا کہ چیئرمین پی سی بی ذکاء اشرف نے پی ایس ایل میچز کے لیے مجوزہ کنٹی جینسی پلانز اور اس کی ترجیحات پر اپنے مکمل اطمینان کا اظہار کیا ہے۔

ترجمان سندھ پولیس نے مزید کہا کہ ذکاء اشرف نے آئی جی سندھ سے اظہار تشکر کرتے ہوئے اپنی اور پی ایس ایل انتظامیہ و عہدیداران کی جانب سے ہر ممکن تعاون کی یقین دہانی کرائی ہے۔