سپریم کورٹ کے جج جسٹس مظاہر نقوی کے بعد جسٹس اعجاز الحسن بھی مستعفیٰ ہوگئے ہیں اور انہوں نے اپنا استعفیٰ صدر مملکت  ڈاکٹر عارف علوی کو بھجوادیا ہے۔ 

جسٹس اعجازالاحسن سپریم کورٹ کی سنیارٹی میں تیسرے سینئر ترین جج تھے، موجودہ چیف جسٹس قاضی فائز عیسیٰ کی ریٹائرمنٹ کے بعد رواں سال اکتوبر میں انہیں چیف جسٹس آف پاکستان بننا تھا۔

جسٹس اعجاز الاحسن، جسٹس سردار طارق مسعود کے بعد سینئر ترین جج تھے تاہم جسٹس سردار طارق مسعود نے چیف جسٹس قاضی فائز عیسی کے ہوتے ہوئے ہی ریٹائر ہوجانا تھا، جسٹس طارق مسعود نے 10 مارچ 2024 کو ریٹائر ہونا ہے۔

جسٹس منصور علی شاہ اگلے چیف جسٹس ہوں گے

دوسری جانب جسٹس اعجاز الاحسن کے استعفے کے ساتھ ہی سپریم کورٹ میں بڑی تبدیلیاں ہوگئیں۔ موجودہ چیف جسٹس قاضی فائز عیسیٰ کی رواں سال اکتوبر میں ریٹائرمنٹ کے بعد جسٹس منصور علی شاہ آئندہ چیف جسٹس ہوں گے۔

علاوہ ازیں سپریم کورٹ آف پاکستان میں 17 ججوں میں سے دو آسامیاں خالی ہوگئیں، سپریم کورٹ میں ججز کی 17 آسامیوں میں سے تین خالی ہوگئیں، سابق چیف جسٹس عمر عطا بندیال اور دو مستعفی  ججز مظاہرعلی اکبر نقوی اور جسٹس اعجاز الاحسن  کی آسامیاں خالی ہوئی ہیں۔

 جوڈیشل کمیشن اور سپریم جوڈیشل کونسل میں بھی اہم تبدیلیاں ہوگئیں۔ جسٹس اعجاز الاحسن کے استعفے سے جسٹس منصور علی شاہ سپریم جوڈیشل کونسل کا حصہ بن گئے اور جسٹس یحیحی آفریدی جوڈیشل کمیشن کے ممبر بن گئے ہیں۔

یہ بھی پڑھیں؛ سپریم جوڈیشل کونسل نےجسٹس ریٹائرڈ مظاہرنقوی کو نوٹس جاری کردیا

یاد رہے کہ سپریم کورٹ کے سابق جج جسٹس مظاہر نقوی نے گزشتہ روز عہدے سے استعفیٰ دیا تھا جسے صدر مملکت نے منظور کرلیا ہے۔ جسٹس (ر) مظاہر نقوی کے خلاف سپریم جوڈیشل کونسل میں ریفرنس زیر سماعت ہے جس میں ان پر اثاثوں سے متعلق الزامات تھے جب کہ ان کی ایک مبینہ آڈیو بھی سامنے آئی تھی۔

صدر مملکت نے سپریم کورٹ کے جج جسٹس مظاہر نقوی کا استعفیٰ منظور کرلیا تاہم سپریم جوڈیشل کونسل نے انہیں صفائی کا ایک اور موقع دیتے ہوئے کہا ہے کہ معاملے کو ہوا میں نہیں چھوڑسکتے، استعفی سے سپریم کورٹ کی ساکھ خطرے میں پڑی۔

خیال رہے کہ جسٹس اعجاز الاحسن پانامہ کیس میں جے آئی ٹی  کے نگران جج بنائے گئے تھے- جسٹس اعجاز الاحسن  کی سربراہی میں مظاہر علی اکبر نقوی پر مشتمل دورکنی بینچ نے ڈی آئی جی غلام محمود ڈوگر کیس میں چیف جسٹس عمر عطا بندیال  کو پنجاب میں 90 روز کے اندر الیکشن  کرانے کے لئے ازخود نوٹس لینے کی سفارش کی تھی.

اس سے قبل آج سپریم جوڈیشل کونسل کی کارروائی شروع ہوئی تو  اٹارنی جنرل منصور عثمان اعوان نے جسٹس مظاہر نقوی کا استعفیٰ پڑھ کر سنایا تاہم سپریم کورٹ کے سینیئر جج جسٹس اعجاز الاحسن نے سپریم جوڈیشل کونسل کے اجلاس سے الگ ہوگئے تھے جس کے بعد جسٹس منصور کو کونسل میں شامل کرلیا گیا۔