کراچی: ایم کیوایم سے متعلق آڈیو لیکس پر وزیر اعلیٰ سندھ کا کہنا ہے کہ انہوں نے ابھی تک آڈیو نہیں سنی ہے۔

وزیر اعلیٰ سندھ مراد علی شاہ کا کہنا ہے کہ ہر حکومت کی ترجیح امن و امان ہوتا ہے جب کہ ہماری سب سے بڑی ذمہ داری امن و امان ہی ہے۔

انہوں نے کہا کہ دو دریا پر ہوائی فائرنگ کرنے والوں سے نمٹ لیں گے، 2008 کے مقابلے میں 2024 میں امن و امان کی صورت حال بہتر ہے جب کہ پیپلزپارٹی نے 2024 کے الیکشن میں سب سے زیادہ سیٹیں لی ہیں۔

وزیراعلیٰ سندھ کہتے ہیں کہ لوگوں نے بڑا مینڈیٹ دیا ہے اور ذمہ داری بھی بڑھ گئی ہے، سندھ میں طوفانی بارشوں کے پیش نظر ہدایات جاری کردی ہیں اور کل تمام متعلقہ اداروں کا اجلاس بلالیا ہے۔

ان کا کہنا تھا کہ کوشش کریں گے کہ لوگوں کی امیدوں پر پورا اتریں، فنانس اور پلاننگ ڈپارٹمنٹ کے ساتھ میٹنگ کی ہے، کوشش کروں گا کہ جلد اپنی ٹیم بنا لوں۔

مراد علی شاہ نے کہا کہ شہبازقلندر کے مزار پر حاضری دی اور انتظامات کاجائزہ لیا جب کہ لعل شہبازقلندر کے عرس کے انتظامات کا بھی جائزہ لیا ہے۔

سیلاب متاثرین پر بات کرتے ہوئے انہوں نے کہا کہ سیلاب کے اثرات ابھی بھی ہیں، سیلاب متاثرین کو جلد بحال کرنا ہے۔

وزیراعلیٰ سندھ نے مزید کہا پینے کے صاف پانی کا ٹاسک ملا ہے، اسے حل کرنے کی کوشش کروں گا۔