پنجاب کے چیف سیکرٹری زاہد اختر زمان سمیت چھ دیگر سرکاری افسران کو پاکستان کرکٹ بورڈ (پی سی بی) میں تعینات کردیا گیا۔

نگران وزیر اعظم انوار الحق کاکڑ نے مارچ میں مدت ملازمت ختم ہونے سے قبل کئی اہم فیصلے کیے ہیں جن میں سے ایک چیف سیکرٹری زاہد اختر زمان سمیت چھ دیگر سرکاری افسران کو پی سی بی میں تعینات کرنا شامل ہے۔

اس سے قبل نگران وزیر اعظم نے پنجاب کے نگران وزیراعلیٰ محسن نقوی کو پی سی بی کا سربراہ نامزد کیا تھا جب کہ انہوں نے پی سی بی بورڈ آف گورنرز کی تعداد بھی دو سے بڑھا کر تین کردی ہے۔

انوار الحق کاکڑ نے محسن نقوی سمیت دو افراد کو نامزد کیا تھا جب کہ مصطفیٰ رمدے کو برقرار رکھنے کا فیصلہ کیا گیا تھا۔ زاہد اختر زمان کے شامل ہونے سے وزیراعظم کے نامزد امیدواروں میں اضافہ ہوا ہے۔

خبر رساں ادارے سے گفتگو میں پی سی بی حکام نے اس بات کی تصدیق کی کہ کچھ آفیشلز کے حوالے سے احکامات جاری کیے گئے ہیں لیکن پی سی بی میں ان کے مخصوص کردار کا تعین ہونا ابھی باقی ہے۔

انہوں نے بتایا کہ پی سی بی کے چیئرمین ابھی چھٹی پر اپنی فیملی کے ہمراہ بیرون ملک مقیم ہیں اور ان کی واپسی پر ہی ان سرکاری اہلکاروں کی ملازمتوں کے بارے میں فیصلہ کیا جائے گا۔

واضح رہے کہ اسٹیبلشمنٹ ڈویژن نے سہیل اشرف، زین عاصم، عبداللہ خرم نیازی، ارتضیٰ کومیل اور رفیع اللہ سمیت ان سرکاری افسران کو پی سی بی جوائن کرنے کا حکم دیا ہے۔