پاکستان تحریک انصاف ( پی ٹی آئی) نے 15 روز میں انٹرا پارٹی الیکشن کروانے کا فیصلہ کیا ہے۔

ذرائع کے مطابق پاکستان تحریک انصاف (پی ٹی آئی) نے انٹرا پارٹی الیکشن کروانے کی تیاریاں شروع کردی ہیں اور اس سلسلے میں شیڈول تیار کرلیا گیا ہے۔ انٹرا پارٹی الیکشن 15 روز میں کروائے جائیں گے۔

بانی پی ٹی آئی کے پینل سے بیرسٹر گوہر کو چئیرمین نامزد کیا گیا ہے جب کہ پی ٹی آئی کے انٹرا پارٹی الیکشن میں چیف الیکشن کمشنر رؤف حسن ہوں گے۔ الیکشن وفاق اور چاروں صوبوں میں بیک وقت منعقد کیے جائیں گے۔

ذرائع کا کہنا ہے کہ بانی پی ٹی آئی عمران خان کی منظوری کے بعد باضابطہ انٹراپارٹی الیکشنز کا شیڈول جاری کیاجائےگا، پینل وائز امیدوار انٹراپارٹی الیکشنز میں حصہ لیں گے۔

ذرائع کے مطابق عام انتخابات کی وجہ سے بانی پی ٹی آئی نے انٹراپارٹی الیکشن روکے تھے تاہم فروری کے آخر یا مارچ کے آغاز میں پولنگ کرائی جائے گی۔

واضح رہے کہ الیکشن کمیشن آف پاکستان نے گزشتہ سال دسمبر میں پاکستان تحریک انصاف کے انٹراپارٹی الیکشن کالعدم قرار دیتے ہوئے پارٹی سے بلے کا انتخابی نشان واپس لے لیا تھا جس کے بعد عام انتخابات میں پی ٹی آئی کے نامزد امیدواروں نے آزاد حیثیت میں انتخابات میں حصہ لیا تھا جہاں انہیں مختلف انتخابی نشانات الاٹ کیے گئے تھے ۔

تاہم الیکشن کمیشن کی جانب سے پی ٹی آئی کے انٹرا پارٹی الیکشن منظور کرلیے جاتے ہیں تو تحریک انصاف بطور جماعت ضمنی الیکشن میں حصہ لے سکے گی۔