اے ٹی سی نے 7 مقدمات میں بانی چیئرمین پی ٹی آئی کی عبوری ضمانتوں پر19 فروری تک توسیع کردی۔

لاہورکی انسداد دہشت گردی عدالت میں 7 مقدمات میں بانی چیئرمین پی ٹی آئی کی عبوری ضمانتوں پر سماعت ہوئی۔ عدالت نے تمام مقدمات میں بانی پی ٹی آئی کی عبوری ضمانت میں 19 فروری تک توسیع کر دی۔

تین مقدمات کی سماعت کورٹ نمبر 1 اور چار مقدمات کی سماعت کورٹ نمبر 3 میں ہوئی۔

انسداد دہشتگردی عدالت کے جج ارشد جاوید نے چار مقدمات میں سماعت کی جبکہ انسداد دہشتگردی عدالت کے ایڈمن جج محمد نوید اقبال تین ضمانتوں پرسماعت کی۔

بانی چیئرمین پی ٹی آئی کی اڈیالہ جیل سے ویڈیو لنک سے حاضری مکمل نہیں ہو سکی، بانی چیئرمین پی ٹی آئی کے وکیل بیرسٹر سلمان صفدرپیش نہیں ہوئے۔

جونیئروکلا نے سماعت مؤخر کرنے کی استدعا کرتے ہوئے کہا کہ ہمارے سینیئر وکیل بیرسٹرسلمان صفدرالقادر ٹرسٹ کیس کی وجہ سے مصروف ہیں۔

مسلم لیگ نون آفس جلانے، کلمہ چوک پرکینٹینر جلانے، ضلے شاہ قتل، زمان پارک جلاؤ گھیراؤ سمیت چار مقدمات کورٹ نمبر 3 میں لگے ہوئے ہیں۔

ایڈمن کورٹ میں جناح ہاؤس حملہ، عسکری ٹاورحملہ اور تھانہ شادمان نذرآتش کیسز میں سماعت ہوئی۔ عدالت نے بانی ہی ٹی آئی کو جیل سے طلبی کی درخواست پر جواب طلب کر لیا۔

بانی پی ٹی آئی کے وکیل بیرسٹر سلمان صفدر نے جیل سے طلبی کی درخواست دائر کر رکھی ہے، وکیل نے مؤقف پیش کیا کہ جیل سے ویڈیو لنک پر بانی چیرمین پی ٹی آئی کی حاضری نہیں۔ استدعا ہے کہ عدالت بانی پی ٹی آئی کو عدالت میں طلب کرنے کا حکم دے۔ گرفتاری سے پہلے بانی پی ٹی آئی باقاعدگی سے عدالت پیش ہوتے رہے تھے۔