مسلم لیگ (ن) کے سینئر رہنما و سابق وفاقی وزیر رانا ثنا اللہ خان نے کہا ہے کہ مسلم لیگ ن کے امیدواروں کی حمایت پر مرکزی علماء کونسل کی قیادت کا مشکور ہوں۔

تفصیلات کے مطابق مسلم لیگ ن کے امیدواروں کی حمایت پر مرکزی علماء کونسل کی قیادت کا مشکور ہوں، یقین دلاتے ہیں تحفظ ناموس رسالت تحفظ ختم نبوت کو اپنے ایمان کا حصہ سمجھتے ہیں، اب صرف 2 دن رہ گئے ہیں جن میں 2 ماہ کا کام کرنا ہے اور لوگوں تک پیغام پہنچانا ہے۔

رانا ثنا اللہ نے کہا کہ پاکستان اس وقت بہت مشکل حالات سے دو چار ہے، 2017 میں پاکستان ترقی کے ٹریک پر تھا سازش کے تحت پاکستان کو پیچھے کی طرف دھکیلا گیا، اس وقت ڈالر کی قدر کم پیٹرول اور چینی سستی اور عام آدمی کی زندگی آسان تھی۔

ان کا کہنا تھا کہ اس وقت منہگائی کا سامنا ہے جس پر قابو پالیا جایے تو ملک آگے بڑھ سکتا ہے، مسلم لیگ ن اور نواز شریف سے وعدہ کیا ہے، قوم اعتبار کرے منہگائی کے عذاب کو ٹالیں گے، قوم اس لئے اعتبار کرے کیونکہ اس سے قبل دہشت گردی اور لوڈشیڈنگ پر قابو پا لیا۔

انہوں نے کہا کہ مہنگائی دہشت گردی سے بڑا چیلنج نہیں ہے، 8 فروری کے بعد مسلم لیگ ن مرکز اور صوبے میں حکومت بنائے گی، ترقی کا سفر دوبارہ شروع ہو گا۔