سابق وزیراعظم شہبازشریف، اے این پی کے سربراہ اسفندیارولی اورسابق وزیرخارجہ بلاول بھٹو نے بلوچستان میں دھماکوں کی مذمت کی ہے۔

صدر مسلم لیگ ن شہبازشریف نے سماجی رابطے کی ویب سائٹ پراپنے پیغام میں کہا کہ بلوچستان کے علاقوں پشین اور قلعہ سیف اللہ میں افسوسناک دھماکوں میں ہونے والے قیمتی جانی نقصان کا سن کرانتہائی دکھ اور تکلیف ہوئی۔

سابق وزیراعظم نے کہا کہ الیکشن سے چند گھنٹے پہلے یہ بزدلانہ دہشتگردی کے حملے ہمارے حوصلے پست نہی کرسکتے۔ اللہ پاک شہدا کو جنت الفردوس میں اعلی مقام عطا فرمائیں اوران کے اہل خانہ کو صبرجمیل دیں۔ آمین

چیئرمین پیپلزپارٹی بلاول بھٹو زرداری نے اپنے بیان میں دہشتگردی کی مذمت اورانسانی جانوں کے نقصان پراظہار افسوس کرتے ہوئے کہا کہ وفاقی اوربلوچستان حکومت قلعہ سیف اللہ اور پشین کے واقعات میں ملوث مجرموں کی گرفتاری کو یقینی بنائے۔ دہشتگردی میں ملوث مجرم ناقابل معافی ہیں۔

سابق وزیرخارجہ نے بم دھماکوں میں جاں بحق افراد کے لواحقین سے ہمدردی اور تعزیت کا اظہارکیا اورزخمیوں کی جلد صحت یابی کیلئے دعا بھی کی۔

اے این پی کے سربراہ اسفند یار ولی نے پشین اورقلعہ سیف اللہ میں دہشتگردی کے واقعات کی مذمت کرتے ہوئے کہا کہ پشین اور قلعہ سیف اللہ دھماکوں میں قیمتی انسانی جانوں کا ضیاع افسوسناک ہے، پشین اور قلعہ سیف اللہ میں شہید ہونے والے افراد کا قصورآخر کیا تھا؟

سربراہ اے این پی نے مذمتی بیان میں کہا کہ دھماکوں میں شہید افراد کے اہل خانہ کے ساتھ شریک ہے، نگران حکومت اورسیکیورٹی ادارے حالات کی سنگینی کا ادراک کرے، ریاست اور حکومت کی ذمہ داری ہے کہ عوام کو تحفظ کا احساس دلائے، معصوم شہریوں کو بے گناہ قتل کرنے والوں کو نشان عبرت بنایا جائے۔

اسفند یار ولی نے کہا کہ ایسے واقعات میں ملوث افراد انسان کہلانے کے بھی لائق نہیں، امن کے دشمن ایسے واقعات سے عوام میں خوف و ہراس پھیلانا چاہتے ہیں، 8 فروری کے انتخابات کو پرامن بنانے کیلئے ہرممکن کوشش کی جائے، واقعات میں زخمی افراد کو صحت کی بہترین اوراعلی سہولیات فراہم کی جائیں۔