پی ایس ایل 9 کے 13 ویں میچ میں بابر اعظم نے اسلام آباد یونائیٹڈ کے خلاف شاندار سنچری کو اپنی والدہ کے نام کردیا۔

گذشتہ روز پاکستان سپر لیگ (پی ایس ایل) سیزن 9 کا 13 واں میچ لاہور کے قذافی اسٹیڈیم میں پشاور زلمی اور اسلام آباد یونائیٹڈ کی ٹیموں کے درمیان کھیلا گیا۔

اس میچ میں پشاور زلمی کے کپتان بابر اعظم نے شاندار سنچری اسکور کی جب کہ انہوں نے 63 گیندوں پر 111 رنز اسکور کیے۔

بابر اعظم نے اس شاندار سنچری کو والدہ کے نام کردیا ہے جو پہلی مرتبہ اپنے بیٹے کا میچ دیکھنے اسٹیڈیم پہنچی تھیں جب کہ انہوں نے اپنی والدہ کا شکریہ ادا بھی کیا۔

بابر اعظم کہتے ہیں ’’میری والدہ پہلی مرتبہ میچ دیکھنے آئی ہیں اور وہ بہت خوش ہیں جب کہ انہوں نے خوب انجوائے بھی کیا ہے، وہ ہمیشہ گھر میں بیٹھ کر ہی میچ دیکھا کرتی تھیں‘‘۔

قومی بیٹر نے کہا ’’میری والدہ میرے لیے خوش قسمتی کا باعث بنی ہیں کیونکہ وہ میچ دیکھنے آئیں اور میں نے سنچری اسکور کی‘‘۔

خیال رہے کہ پشاور زلمی نے اس میچ میں بابر اعظم کی شاندار سنچری اور عارف یعقوب کی پانچ وکٹوں کے باعث اسلام آباد یونائیٹڈ کو 8 رنز سے شکست دی ہے۔

202 رنز کا ہدف دینے کے بعد پشاور زلمی نے موثر طریقے سے اپنے ہدف کا دفاع کیا اور اسلام آباد یونائیٹڈ کی ٹیم 9 وکٹوں کے نقصان پر 193 رنز ہی بناسکی جب کہ یہ پشاور زلمی کی ٹورنامنٹ میں تیسری جیت ہے۔