آئی ٹی ایکسپورٹ میں نمایاں کارکردگی کے باعث 550 کمپنیوں کیلئے کروڑوں روپے کے نقد انعامات اور ایوارڈز بانٹے گئے۔

تفصیلات کے مطابق وزارت آئی ٹی و ٹیلی کمیونیکیشن کے ادارے پاکستان سافٹ ویئر ایکسپورٹ بورڈ کے زیر اہتمام تقریب تقسیم انعامات کا انعقاد ہوا۔

نگران وفاقی وزیر انفارمیشن ٹیکنالوجی و ٹیلی کمیونیکیشن ڈاکٹر عمر سیف نے تقریب تقسیم انعامات و ایوارڈز میں خطاب کرتے ہوئے کہا کہ معاشی استحکام میں کردار آئی ٹی انڈسٹری سہولیات اور انعامات کی مستحق ہے، شاندار کارکردگی کی حامل کمپنیوں کو نقد انعامات کے ساتھ خصوصی ایوارڈز بھی دیئے گئے، معیشت میں بنیادی اہمیت کی حامل آئی ٹی انڈسٹری مراعات اور انعامات کی مستحق ہے، پاکستانی ہنرمندوں کی ڈیجیٹل صلاحیتوں کی خدمات کے عیوض بھاری زرمبادلہ مل رہا ہے۔

ڈاکٹر عمر سیف کا کہنا تھا کہ آئی ٹی سیکٹر کی مثبت کارکردگی 10 ارب ڈالرز آئی ٹی ایکسپورٹ کا ہدف بھی حاصل کر لیں گے، خصوصی سرمایہ کاری سہولت کونسل کے بروقت فیصلوں کے ثمرات آرہے ہیں، گذشتہ 60 دنوں میں آئی ٹی ایکسپورٹ میں مجموعی طور پر 32 فیصد کا ریکارڈ اضافہ ہوا ہے، آئی ٹی سیکٹر کی شاندار کارکردگی سالانہ بجٹ میں مختص فنڈز سے نقد انعامات کا فیصلہ کیا۔

ان کا کہنا تھا کہ خصوصی فنڈ سے مثبت نمو کی حامل 550 کمپنیوں میں کروڑوں روپے تقسیم کیئے گئے ہیں، انعامات کیلئے 6 کیٹگریز پہلی ٹاپ 100 کمپنیوں کو 25 لاکھ روپے فی کس انعام دیا گیا، 100 کمپنیوں کو 20 لاکھ 100 کمپنیوں کو 15 لاکھ، 100 کمپنیوں کو 12 لاکھ 50 ہزار کے انعام ملے، مزید 100 کمپنیوں کو 7 لاکھ 50 اور 50 کمپنیوں کو فی کس 5 لاکھ روپے نقد انعامات سے نوازا گیا، ان 550 کمپنیوں میں سے ٹاپ 10 کمپنیوں کو شاندار کارکردگی پر نقد انعامات کے ساتھ ٹرافی بھی عطا کی گئیں۔

ڈاکٹر عمر سیف نے کہا کہ خصوصی پروگرام کے تحت زیر تربیت آئی ٹی ہنرمندوں کو ملازمت فراہم کرنے والی کمپنیوں کو بھی رقم دی جائے گی، ہائر ایجوکیشن کمیشن اور آئی ٹی کمپنیوں کی ایسوسی ایشن (پاشا) کے اشتراک سے آئی ٹی ٹیسٹ کا انعقاد کیا گیا تھا، کامیاب 3500 امیدواروں زیرتربیت نوجوانوں کو ملازمت فراہم کرنے والی کمپنیوں کو فی امیدوار 50 ہزار روپے ادا کیئے جائیں گے، ان نوجوان ہنرمندوں کو عملی دنیا میں کام کرنے کا موقع اور تجربہ مل سکے گا۔