افغان طالبان کی جانب سے 2021 میں افغانستان پر قبضے کے بعد سے خطے کے پڑوسی ممالک میں دہشت گردی کے واقعات میں اضافہ دیکھنے میں آیا ہے۔

افغانستان کے پڑوسی اور دیگر ممالک نے افغان طالبان کو شواہد پیش کیے کہ افغانستان کی سرزمین دہشت گردی کیلئے استعمال ہورہی ہے اور پڑوسی ممالک ان دہشت گردانہ کارروائیوں سے شدید متاثر ہیں۔

رواں ماہ کے آغاز میں خطے کے چار اہم ممالک پاکستان، روس، چین اور ایران نے افغان طالبان کے ساتھ مختلف دہشت گرد گروہوں کی سرگرمیوں کو روکنے کے لیے خاطر خواہ اقدامات نہ کرنے پر مشترکہ احتجاج ریکارڈ کرایا۔

مشترکہ احتجاج کی تجویز پاکستان کی طرف سے آئی جس کا مقصد افغانستان کے اہم ہمسایہ ممالک کی جانب سے ایک متحدہ موقف اپناتے ہوئے افغان طالبان کی حکومت کو دہشت گردی کے خلاف کارروائیوں پر مجبور کرنا تھا۔

تاہم جب چاروں ممالک نے اپنے نمائندے کابل بھیجنے پر اتفاق کیا تو افغان طالبان نے غیر منطقی اقدام اٹھائے ہوئے کانفرنس میں دیگر ممالک بھارت، ترکی، انڈونیشیا اور بعض وسطی ایشیائی ریاستوں کے حکام کو مدعو کرلیا جن کاافغانستان کی سرزمین سے دہشت گردی سے متاثرہ ممالک میں شمار نہیں ہوتا۔

اس حوالے سے پاک فوج نے 11 فروری 2024ء کو ضلع خیبر میں کامیاب آپریشن کے دوران دہشت گرد تنظیم داعش کے سرغنہ صورت گل عرف سیف اللہ کو جہنم واصل کیا جس سے پاکستان کے موقف کی تائید ہوتی ہے۔

کابل میں پاکستان کے ناظم الامور نے روس، ایران اور چین کے خصوصی ایلچی کے ساتھ مل کر دہشت گرد گروپوں کی جانب سے افغان سرزمین کے استعمال پر تحفظات کا اظہار کیا۔

اقوام متحدہ کی ایک حالیہ رپورٹ میں بتایا گیا کہ اگرچہ افغان طالبان عام طور پر ٹی ٹی پی اور اس کے مقاصد کے بارے میں ”ہمدردانہ” نظریہ رکھتے ہیں لیکن اس کے کچھ ارکان نے تو اپنا مذہبی فریضہ سمجھ کر پاکستان مخالف دہشت گرد تنظیم ٹی ٹی پی میں شمولیت اختیار کرلی ہے۔

خیال رہے کہ دو سال سے زیادہ اقتدار میں رہنے کے باوجود ابھی تک کسی بھی ملک نے متعدد معاملات پرمثبت پیش رفت نہ ہونے کا حوالہ دیتے ہوئے  طالبان کی حکومت کو سرکاری طور پر تسلیم نہیں کیا ہے۔

کیا افغان طالبان دہشت گردوں کے خلاف موثر کارروائی کرتے ہوئے باہمی تعلقات کو مثبت سمت میں استوار کریں گے یا دہشت گردوں کی پشت پناہی جاری رکھیں گے؟