نئی دہلی: دہلی چلو مارچ کے چوتھے روز بھی مودی سرکار کی جانب سے بھارتی کسانوں پر شیلنگ اور پیلٹ گن سے وار کیے گئے۔

بھارت میں کسانوں کا دہلی چلو مارچ جاری ہے جب کہ مودی سرکار اور ہریانہ پولیس کا سکھ کسانوں پر تشدد جاری ہے۔

بھارتی میڈیا کے مطابق دہلی چلو مارچ کے مظاہرین پر ہریانہ پولیس نے چوتھے روز بھی شیلنگ اور پیلٹ گن سے وار کیے جب کہ مظاہرین کے خلاف تصادم میں تین کسان بینائی سے محروم ہوگئے۔

یہ بھی پڑھیں: بھارت میں کسانوں کا احتجاج، دہلی کی سرحدوں پر ایک ماہ کیلئے کرفیو نافذ

بھارتی میڈیا کا کہنا ہے کہ 100 سے زائد مظاہرین شدید زخمی ہیں جنہیں اسپتال منتقل کردیا گیا ہے جب کہ ہریانہ پولیس نے کسانوں کو دہلی کی طرف مارچ سے روکنے کے لیے مظاہرین پر آنسو گیس کے گولے اور ربڑ کی گولیاں بھی چلائی ہیں۔

وزیر صحت پنجاب کہتے ہیں کہ ہم نے تین کسان مظاہرین کی آنکھوں کا معائنہ کیا لیکن ان کی بینائی نہیں بچاسکے، کسانوں کی بینائی پیلٹ گنز کے استعمال سے گئی ہے۔

خیال رہے کہ کسانوں کی جانب سے مطالبات کی منظوری تک مارچ جاری رکھنے کا اعلان کیا گیا ہے۔

بھارتی کسان کہتے ہیں کہ مودی کی انتہا پسندانہ پالیسیوں کے باوجود کسان اپنے حق کے لیے ڈٹے رہیں گے۔

واضح رہے کہ بھارتی پولیس نے دہلی اور مضافات میں ایک مہینے کے لیے دفعہ 144 نافذ کردی ہیں اور دہلی آنے والے تمام راستوں پر روکاوٹیں کھڑی کردی گئی ہیں۔