آئی ایس پی آر نے قوم کو مبارکباد دیتے ہوئے اپنے پیغام میں کہا کہ انتخابی عمل کے دوران سیکیورٹی کی فراہمی کی اہم ترین ذمہ داری پر افواج پاکستان اور دیگر قانون نافذ کرنے والے اداروں کو فخر ہے۔ 

پاک فوج کے شعبہ برائے تعلقاتِ عامہ آئی ایس پی آرکی جانب سے جاری بیان میں کہا گیا کہ ہم عام انتخابات کے پرامن انعقاد پر قوم کو دلی مبارکباد پیش کرتے ہیں، انتخابی عمل کے دوران سیکیورٹی فراہمی کی اہم ترین ذمہ داری پر افواج پاکستان اور دیگر قانون نافذ کرنے والے اداروں کو فخر ہے۔

آئی ایس پی آر کا کہنا ہے کہ آئین پاکستان کے تحت افواج پاکستان اور دیگر قانون نافذ کرنے والے اداروں نے سول حکام کو اعانت فراہم کی۔ مجموعی طور پر 137000 فوجی اورسول آرمڈ فورسز اہلکاروں نے ڈیوٹی انجام دی۔ دہشت گردی کے 51 واقعات جن میں سے زیادہ تر کے پی اور بلوچستان میں ہوئے۔

آئی ایس پی آر کے مطابق ملک بھر میں امن اور سیکیورٹی کے لئے فوجی اہلکار پرعزم رہے، دہشت گردی کے واقعات میں 12 شہری بشمول سیکیورٹی اہلکارشہید اور 39 افراد زخمی ہوئے، متحرک انٹیلی جنس اور بروقت کارروائیوں کی بدولت کئی خطرات کو ناکام بنایا گیا۔

آئی ایس پی آر کا کہنا ہے کہ شہریوں کے جمہوری حق کے تحفظ کے لئے سیکیورٹی فورسز پرعزم رہیں، مختلف کارروائیوں میں 5 دہشت گرد بھی ہلاک ہوئے، جمہوری عمل کے تحفظ کے لئے یکجا ہو کر کام کرنے پر دیگر قانون نافذ کرنے والے اداروں کے مشکور ہیں، امید واثق ہے کہ ہماری قربانیاں رائیگاں نہیں جائیں گی۔

آئی ایس پی آرنے بیان میں مزید کہا کہ توقع ہے کہ عام انتخابات پاکستان میں جمہوری عمل کو تقویت بخشنے کا باعث بنیں گے، توقع ہے کہ الیکشن پاکستان کے عوام کی امنگوں کو حقیقت میں بدلنے کا باعث بنیں گے، افواج پاکستان ملک میں امن اور سیکیورٹی کے لئے پرعزم ہیں، افواج پاکستان ریاست کی جمہوری روایات کے تحفظ کے لئے غیرمتزلزل حمایت کے لئے ہمہ تیار ہیں۔