گوادر کو طوفانی بارشوں کے بعد تشویشناک صورتحال کے باعث آفت زدہ قرار دے دیا گیا۔

گوادر اور گردو نواح میں بارش اور ژالہ باری جاری ہے ، نگور میں بارشوں سے کھیتوں کے حفاظتی بند ٹوٹ گئے ہیں جس کی وجہ سے پانی گوادر شہر کی طرف بڑھنے کا خدشہ ہے۔

نگراں صوبائی وزیراطلاعات جان اچکزئی کا کہنا ہے کہ متاثرہ علاقوں کی مانیٹرنگ کر رہے ہیں، گوادر کو حالیہ طوفانی بارشوں کے بعد تشویشناک صورتحال کے باعث آفت زدہ قرار دیا گیا، گوادر کو آفت زدہ قرار دینے کے حوالے سے نگراں وزیراعلیٰ نے سمری پر دستخط کردیے ہیں۔

 علاوہ ازیں نگراں وزیراعلیٰ بلوچستان میر علی مردان ڈومکی نے کہا کہ گوادر میں ریسکیو کارروائیوں کا سلسلہ جاری ہے، مسلسل بارشوں کی وجہ سے غیر معمولی صورتحال پیدا ہوئی، ہنگامی اقدامات اٹھائے جاررہے ہیں، سول انتظامیہ پاک فوج کے شانہ بشانہ ریسکیو آپریشن میں مصروف ہے، آفت کی اس گھڑی میں تمام وسائل بروئےکار لائے جائیں۔

دوسری جانب کوئٹہ میں بھی بارش سے سڑکیں زیر آب  آگئیں جبکہ مستونگ، قلات، چاغی،چمن،قلعہ عبداللہ اورپشین سمیت بلوچستان کے دیگر اضلاع میں بھِی بارش سے ندی نالوں میں طغیانی آگئی۔

یاد رہے کہ گوادر میں بارشوں کے بعد کئی علاقے اب بھی زیرآب آگئے ہیں جبکہ مزید بارش کا سلسلہ بھی جاری ہے،مسلسل بارشوں سے گھروں میں گھٹنوں گھٹنوں پانی جمع ہوگیا۔

واضح رہے کہ گوادر میں گزشتہ دو روز کے دوران 183 ملی میٹر بارش ریکارڈ کی گئی جبکہ مزید بارش کی پیشگوئی بھی کی گئی ہے۔